Полиция жоғалған отбасының ісін «шештім» деген хакерді іздестіруде

Фото көзі: Pixabay

Қаһар Бинахметов

Қаң. 9, 2026, 9:13 Т.Ж.

Атырау облысының құқық қорғау органдары әлеуметтік желіде өзін «хакер» ретінде таныстырып, Жангелдин ауылынан жоғалып кеткен отбасының жағдайын анықтадым деп мәлімдеген тұлғаға іздеу жариялады, деп хабарлайды ZontNews.kz.

Полиция департаменті бұл азаматтың таратқан деректерін ресми тергеу материалдарын қайталау және жалған мәлімет тарату деп бағалап отыр.

Департаменттің хабарлауынша аталған тұлғаның SIM-карталарға, геолокация деректеріне және қаржылық аударымдарға техникалық талдау жасадым деген уәждері негізсіз. Барлық маңызды ақпарат құқық қорғау органдарымен ресми іздестіру шаралары барысында әлдеқайда ерте белгілі болған.

«Бұл мәліметтердің барлығы құқық қорғау органдары тарапынан әлеуметтік желілердегі жарияланымдар шықпай тұрып-ақ заңды жедел-іздестіру шаралары барысында анықталып, ресми бағдарлау ретінде рәсімделген» – деп хабарлады Атырау облысының полиция департаменті.

Тергеушілер бұл адамның ешқандай жаңа дерек таппағанын, тек ресми органдардың мәліметтерін өз атынан таратқанын алға тартты. Сонымен қатар полиция іздеудегі азаматтың бұған дейін де заңмен проблемалары болғанын мәлімдеді.

«Аталған тұлғаға қатысты бұған дейін алаяқтық деректері бойынша төрт қылмыстық іс тіркелген. Қазіргі уақытта бұл істер бойынша тергеу жалғасуда және оған іздеу жарияланған» – деп мәлімдеді ведомство.

Ал өзін «хакер» деп таныстырған тұлға мемлекеттік ақпараттық жүйелерді бұзбағанын, тек ашық дереккөздер мен байланыс операторларының мәліметтерін талдау арқылы нәтиже шығарғанын айтып, өз әрекетін қорғауда. Полиция бұл жағдайды азаматтарды адастыру және тергеуге кедергі келтіру әрекеті ретінде қарастырып отыр.

Бұл туралы не ойлайсыз?