Қорғаста халықаралық әуежай салуға 840 гектар жер бөлінді
Жетісу облысындағы Қорғас аумағында халықаралық әуежай салу жобасына дайындық жалғасып жатыр. Алайда құны шамамен 250 миллиард теңгені құрайтын ауқымды жобаның құрылысы әлі басталған жоқ. Бұған басты себеп – негізгі инвестордың табылмауы. Бұл ZontNews.kz. Orda.kz сайтына сілтеме жасап хабарлайды.
Жоба «Қорғас – Шығыс қақпасы» арнайы экономикалық аймағында жүзеге асырылмақ. Болашақ әуежай авиациялық-логистикалық кластердің құрамына еніп, әуе, теміржол және автокөлік тасымалын біріктіретін мультимодальды жүйенің маңызды бөлігіне айналады деп жоспарланған.
Әуежай құрылысына 840 гектар жер бөлінген. Кешен құрамында жолаушылар және жүк терминалдары, авиациялық отын қоймасы, техникалық қызмет көрсету орталығы, қонақүй, бизнес-орталық және туристік инфрақұрылым нысандары болады.
Панфилов ауданы әкімдігінің мәліметінше, жобаның мастер-жоспары мемлекеттік органдармен келісілген, инженерлік іздестіру жұмыстары аяқталған. Қазіргі уақытта техникалық-экономикалық негіздеме әзірленіп, жобалық-сметалық құжаттамаға дайындық жүргізілуде.
Жобаны қазақстандық-германдық «Skyhansa» компаниясы іске асыруды көздейді. Әзірлеушілер халықаралық әуе және логистикалық компаниялармен келіссөздер жүргізіп, бірқатар меморандумдарға қол қойған.
Соған қарамастан, қаржыландыру мәселесі шешілмей отыр. Бұған дейін қарастырылған екі инвестициялық қор жобадан бас тартқан. Сондықтан құрылыс жұмыстары 2026 жылдың үшінші-төртінші тоқсанына шегерілген.
Әкімдік болжамынша, әуежай іске қосылған жағдайда оның транзиттік әлеуеті жылына 13 мыңнан астам рейске жетуі мүмкін. Экономикалық есептер бойынша жоба шамамен сегіз жыл ішінде өзін ақтайды.
Сарапшы сөзі
Тағы
Сізді де қызықтырады
Сұхбат
Бөлімге өтіңіз
Trends
Бөлімге өтіңіз
Әзірге түсініктеме жоқ!
Пікір қалдыратын бірінші адам болыңыз