Қорғанысқа – 41 млрд, әлеуметтік қорғаудан – 55 млрд теңге

Қазақстан Үкіметі 14 қазанда 2026 жылға арналған республикалық бюджет көрсеткіштерін түзетті. Шығыстардың жалпы көлемі өзгерген жоқ – қаражат мемлекеттік органдар мен бюджеттік бағдарламалар арасында қайта бөлінді, деп хабарлайды ZontNews.kz. Exclusive.kz басылымына сілтеме жасап.

Ең елеулі өзгерістердің бірі күштік құрылымдарға қатысты. Қорғаныс министрлігінің бюджеті шамамен 41,3 млрд теңгеге, Ішкі істер министрлігінің бюджеті 26,1 млрд теңгеге, Ұлттық қауіпсіздік комитетінікі 31 млрд теңгеге ұлғайтылды. Төтенше жағдайлар министрлігіне 10 млрд теңгеден астам, Бас прокуратураға шамамен 5 млрд теңге қосымша бөлінді.

Қаржылық мониторинг агенттігі мен Қауіпсіздік кеңесінің аппараты да қосымша қаражат алды. «Қорғаныс» функционалдық тобы бойынша өсім 51,6 млрд теңгеден асты.

Ал Еңбек және халықты әлеуметтік қорғау министрлігінің шығыстары шамамен 55 млрд теңгеге қысқарды. Қаражаттың негізгі бөлігі азаматтардың жекелеген санаттарын әлеуметтік қамтамасыз етуге және төлемдерді сүйемелдеуге арналған бағдарламадан алынды. Бұл бағыттағы қаржыландыру 55,2 млрд теңгеге азайды.

Ғылым мен білім беруді қаржыландыруда да айтарлықтай өзгерістер болды. «Ғылымды дамыту» бағдарламасының шығыстары шамамен 10,3 млрд теңгеге қысқартылды. Сонымен қатар жоғары және жоғары оқу орнынан кейінгі білім беруге бөлінетін қаражат 14,9 млрд теңгеге жуық ұлғайтылды.

Орталық сайлау комиссиясының бюджеті шамамен 1,6 млрд теңгеге азайды. Оның ішінде сайлау өткізуге арналған шығыстар 1,7 млрд теңгеге жуық қысқарды. Бюджетке түзету ОСК мәслихат депутаттарының кезектен тыс сайлауын 29 қарашаға белгілегеннен кейінгі күні – 14 қазанда бекітілген.

Денсаулық сақтау саласының жалпы қаржыландыру көлемі айтарлықтай өзгермегенімен, жекелеген бағдарламалар арасында қаражат қайта бөлінді. Арнайы медициналық резервті сақтау мен инфрақұрылымды дамытуға арналған шығындар шамамен 4,9 млрд теңгеге қысқарды. Ал Әлеуметтік медициналық сақтандыру қорына 2 млрд теңгеге жуық, кепілдендірілген тегін медициналық көмек көлеміне тағы 2,5 млрд теңге бағытталды.

Көлік бағдарламалары бойынша да шығыстар қысқартылды. Мемлекеттік шекарадағы өткізу пункттерін салу мен қайта жаңғыртуға, республикалық автожолдарды, қалалық рельсті көлікті және шекара инфрақұрылымын дамытуға арналған қаражат азайтылды. Сонымен бірге автомобиль жолдарын жөндеуге, күтіп ұстауға және мемлекеттік-жекеменшік әріптестік міндеттемелерін орындауға қосымша қаражат бөлінді.

Ұлттық экономика министрлігіне кәсіпкерлікті мемлекеттік қолдау шараларына қарастырылған шамамен 30 млрд теңге қысқартылды. Ауыл шаруашылығы министрлігінің бюджеті де 10 млрд теңгеге жуық азайды. Қысқарту негізінен қаржылық қызметтердің қолжетімділігін арттыру бағдарламасына қатысты болды.

Ең ірі қысқартулардың бірі мемлекеттік борышқа қызмет көрсетуге тиесілі. Қаржы министрлігінің үкіметтік борышқа қызмет көрсету шығындары 71,9 млрд теңгеге азайтылды.

Мемлекет басшысының қызметін қамтамасыз етуге арналған шығыстар 386 млн теңгеге қысқарды. Ал премьер-министрдің қызметін қамтамасыз ету шығындары, керісінше, шамамен 311 млн теңгеге өсті.

Бұл түзетулер ішкі қайта бөлу сипатында жүргізілген. Үкімет қаулысының қосымшасында өзгерістердің қорытынды сомасы нөл деп көрсетілген. Яғни бір мемлекеттік органның қосымша шығыстары екіншісінің бюджетін қысқарту есебінен өтеледі.