Instagram-дағы «ипотекалық брокер» алаяқтық үшін 6 жылға сотталды
Астанада төрт жыл бойы әлеуметтік желі арқылы азаматтардың сеніміне кіріп, ірі көлемде қаражат жымқырған 30 жастағы ер адамға қатысты сот үкімі шықты. Айыпталушы 2021-2025 жылдар аралығында Instagram-да өзін ипотекалық брокер ретінде таныстырып, жұртты алдап келген, деп хабарлайды ZontNews.kz.
Тергеу материалдарына сүйенсек, алаяқ азаматтарға «7-20-25» мемлекеттік бағдарламасы бойынша баспана алуға көмектесуге уәде берген. Сондай-ақ ол жәбірленушілерге жоғары табыс әкелетін жиһаз бизнесіне инвестиция салуды ұсынған. Алдамшы уәделерге сенген азаматтар оның жеке шотына ірі көлемде қаражат аударғанымен, күдікті ешқандай міндеттемесін орындамай, ақшаны өз игілігіне жұмсап отырған.
«Аталған қылмыстық схемадан жалпы 25 адам зардап шекті. Мемлекетке және жеке тұлғаларға келтірілген жиынтық шығын көлемі 95 миллион теңгеден асты» – деп хабарлады елордалық прокуратура өкілдері.
Сот үкім кесерде бірқатар жеңілдетуші жағдайларды ескерді. Айыпталушының өз кінәсін толық мойындауы, кәмелетке толмаған баласының болуы және жәбірленушілерге келтірілген шығынның бір бөлігін өтеуі жаза мерзіміне әсер етті. Нәтижесінде сот шешімімен ол 6 жылға бас бостандығынан айырылды.
Прокуратура органдары азаматтарды әлеуметтік желідегі күмәнді жарнамалар мен делдалдардың қызметіне сақтықпен қарауға шақырады. Кез келген қаржылық операцияны жасамас бұрын ақпараттың шынайылығын ресми дереккөздер арқылы тексеру қажеттігі ескертілді.
Өңірлер
Тағы
Сізді де қызықтырады
Сұхбат
Бөлімге өтіңіз
Trends
Бөлімге өтіңіз
Сарапшы сөзі
Бөлімге өтіңіз
Әзірге түсініктеме жоқ!
Пікір қалдыратын бірінші адам болыңыз