Үкіметте инфляцияны тежеу және бағаның өсуіне жол бермеу шаралары талқыланды

Премьер-министрдің орынбасары - Ұлттық экономика министрі Серік Жұманғариннің төрағалығымен инфляцияны тұрақтандыру жөніндегі кеңес өтті. Жиында елдегі баға ахуалы, инфляцияның алдағы динамикасы және бағаның өсуін тежеу шаралары қаралды, деп хабарлайды ZontNews.kz.

Қазақстанда жылдық инфляция 10,2% деңгейінде қалып отыр. Сонымен қатар бірқатар өңірлерде бағаның өсу қарқыны республикалық орташа көрсеткіштен жоғары.

Кеңесте реттелетін тауарлар мен қызметтер тарифтерінің ықтимал өсуі ескеріліп, инфляцияның алдағы кезеңдегі бірнеше сценарийі қарастырылды. Осыған байланысты Табиғи монополияларды реттеу комитетіне тарифтердің инфляцияға ықпалын қайта есептеп, олардың өсу параметрлерін түзету тапсырылды.

Азық-түлік бағасы баяулады

Шілдеде азық-түлік инфляциясы 0,4% болды. Бұл маусымдағы көрсеткіштен 0,2 пайыздық тармаққа төмен. Ал әлеуметтік маңызы бар азық-түлік тауарларының бағасы шілдеде 0,3%-ға арзандады.

Сауда және интеграция министрлігі азық-түлік инфляциясын орта есеппен тағы 0,2 пайыздық тармаққа төмендетуді мақсат етіп отыр.

Нан бағасының жыл басынан бергі өсімі де болжамды деңгейден төмен қалыптасты. Бұған әлеуметтік маңызы бар азық-түлік өндірушілеріне, оның ішінде нан пісірушілерге арзандатылған электр энергиясын беру шаралары ықпал етті.

Қант нарығы бақылауда

Кеңесте қант нарығындағы жағдайға да ерекше назар аударылды. Қазақстандағы қант қызылшасын өңдеудің жалпы тәуліктік қуаты 8,7 мың тоннаны құрайды. Сонымен қатар қамыс шикізатын өңдейтін төрт зауыт жұмыс істейді.

2026 жылдың қаңтар-маусым айларында елімізде 77 мың тонна қант өндірілді. Оның 9 мың тоннасы - қызылшадан, 68 мың тоннасы - қамыс шикізатынан алынған.

Импортқа тәуелділікті ескере отырып, мемлекет биыл 100 мың тонна шикі қантты бажсыз әкелу туралы шешім қабылдады. Ауыл шаруашылығы министрлігіне нарық өкілдерімен қосымша кеңес өткізіп, қант бағасын тұрақтандыру шараларын әзірлеу тапсырылды.

Сүт пен ақылы қызметтер бағасы

Шілдеде сүт нарығындағы орташа баға іс жүзінде өзгерген. Бұған дейін, маусымда, баға 0,7%-ға өскен. Ауыл шаруашылығы министрлігіне шикі сүт өндірушілермен кездесіп, өнімнің өзіндік құнына әсер ететін факторларды зерделеу тапсырылды.

Ақылы қызметтер нарығында да баға қысымы сақталып отыр. Шілдеде олардың бағасы айлық есеппен 0,7%-ға, ал жылдық мәнде 9,2%-ға өсті.

Бағаның ең жоғары өсу қарқыны денсаулық сақтау, көлік, білім беру, туризм және спорт салаларында байқалды. Сонымен қатар жеті айда денсаулық сақтау қызметтерінің бағасы 10,1%-ға, байланыс қызметтері 5,5%-ға өскен.

Дәрі-дәрмек бағасы да тексеріледі

Кеңесте дәрі-дәрмек бағасына да ерекше назар аударылды. Бәсекелестікті қорғау және дамыту агенттігі фармацевтика нарығына талдау жүргізіп, баға қалыптасуына әсер ететін негізгі факторларды анықтайды.

Инфляция деңгейі республикалық орташа көрсеткіштен жоғары өңірлерге жеке тапсырмалар берілді. Әкімдіктер бір апта ішінде негізгі азық-түлік тауарларын жеткізушілермен кездесіп, бағаны тұрақтандыру бойынша нақты шаралар қабылдауы тиіс.

Серік Жұманғариннің айтуынша, инфляцияға әсер ететін факторлардың едәуір бөлігі жекелеген тауарлар мен өңірлік нарықтарға байланысты. Сондықтан әрбір фактор бойынша нақты жұмыс жүргізіліп, жағдай апта сайын бақылауға алынады.

Негізгі мақсат - инфляция қарқынын төмендетіп, халық үшін маңызды тауарлар мен қызметтер бағасының негізсіз өсуіне жол бермеу.