Алматыда әскерде қаза тапқан сарбаздардың аналары әділдік талап етті

Алматыда әскери борышын өтеу кезінде ұлдарынан айырылған аналар баспасөз мәслихатын өткізіп, олардың өліміне қатысты істерді әділ тергеуді талап етті. Бұл туралы ZontNews.kz  Ulysmedia.kz сайтына сілтеме жасап хабарлайды.

Аналар тергеудің созылып кеткеніне, кейбір істердің суицид ретінде жабылғанына және жауапты тұлғалардың тиісті жазасын алмағанына наразылық білдірді.

Жиында 2023 жылы Астанадағы Ұлттық ұланның №6636 әскери бөлімінде қаза тапқан Қайсар Сұлтановтың анасы Сәуле Тілеубергенова ұлының өз-өзіне қол жұмсағанына сенбейтінін айтты. Оның сөзінше, іс үш рет суицид дерегі бойынша жабылып, қайта ашылған. Анасы істі адам өлтіру бабы бойынша қайта саралауды талап етеді.

Тағы бір ана Индира Туғанбаева ұлы Алмас Шахимовтың өліміне қатысты тергеуге наразылығын білдірді. Оның айтуынша, сарбаз әскери бөлімде қызмет еткен кезде атына несие рәсімделген. Бұған дейін бұрынғы взвод командирі осы іске байланысты екі жылға бас бостандығын шектеу жазасына кесілген. Алайда анасы бұл жазаны әділетсіз деп санайды және істі қайта қарауды сұрайды.

Ал Шынар Иманғалиева әскери борышын өтеп жүрген ұлы Өсербай Ақанның оқу-жаттығу кезінде әскери техниканың астында қалып көз жұмғанын айтты. Анасы техниканың жарамсыз болғанын біле тұра пайдалануға рұқсат берген басшылықтың да жауапқа тартылуын талап етеді.

Аналар әскери бөлімдердегі қауіпсіздікті күшейтіп, сарбаздардың өліміне қатысты барлық істі объективті тергеуді және әскери салада жүйелі реформалар жүргізуді сұрады.

Еске салайық, бұған дейін Маңғыстау облысында әскери оқу-жаттығу кезінде 14 әскери қызметші қаза тапқан еді. Осыдан кейін Президент Қасым-Жомарт Тоқаев әскери салада реформалар жүргізуді тапсырған.