Тоқаев жемқорлық тәуекелдерін азайтуды тапсырды

Президент Қасым-Жомарт Тоқаев Үкімет пен бақылаушы органдарға квазимемлекеттік сектордағы сыбайлас жемқорлық тәуекелдерін барынша азайту жөнінде ұсыныстар әзірлеуді тапсырды, деп хабарлайды  ZontNews.kz.

Мемлекет басшысы жоғары лауазымның үлкен жауапкершілік жүктейтінін атап өтті. Оның айтуынша, қоғамда ешкім атқаратын қызметіне, бұрынғы еңбегіне немесе туыстық және өзге де байланыстарына қарамастан, заңнан жоғары тұра алмайды.

Президент кейінгі уақытта бұрын жасалған кейбір келісімдер мен шарттардың қайта қаралғанын айтты. Сонымен бірге биліктің кәсіпкерлердің жұмысына кедергі келтіруді көздемейтінін, керісінше, бизнеске қолдау көрсетілетінін жеткізді.

Тоқаев «Самұрық-Қазына» қоры мен мемлекеттік компаниялардың, соның ішінде «Қазақстан темір жолының» қызметі қалыпты тәртіппен жалғасатынын мәлімдеді. Оның пікірінше, жемқорлыққа қарсы күрес инвесторлар мен несие берушілердің аталған институттарға деген сенімін арттырады.

Мемлекет басшысының мәліметінше, Бас прокуратура жалпы сомасы 1,3 трлн теңгеден асатын заңсыз иемденілген активтерді қайтарған. Бұл қаражат 466 әлеуметтік және инфрақұрылымдық нысанның құрылысына бағытталған. Қазір олардың 383-і пайдалануға берілген.

Президент салынған нысандардың, әсіресе жолдардың сапасын тексеруге негіз бар екенін де атап өтті. Кейбір нысандардың сапасы белгіленген талаптарға сәйкес келмейді.

Үкімет пен бақылаушы органдар 24 қарашаға дейін квазимемлекеттік сектордағы сыбайлас жемқорлық құқықбұзушылықтарын азайту, сондай-ақ компаниялар мен олардың қызметкерлерінің жұмыс сапасын жақсарту жөніндегі ұсыныстарын Президентке ұсынуы тиіс.

Бұған дейін Ұлттық қауіпсіздік комитеті «Самұрық-Қазына» басқарма төрағасы Нұрлан Жақыпов пен ҚТЖ басшысы Елжас Отынышиевтің сыбайлас жемқорлық қылмысына қатысы болуы мүмкін деген күдікпен ұсталғанын хабарлаған еді. Тергеу жалғасып жатыр. Сот үкімі заңды күшіне енгенге дейін күдіктілер кінәсіз деп есептеледі.