Садыр Жапаров экс-президент Атамбаевты барлық атақ-даңқынан айырды
Қырғызстан президенті Садыр Жапаров бұрынғы мемлекет басшысы Алмазбек Атамбаевты елдің барлық мемлекеттік марапаттарынан айыру туралы жарлыққа қол қойды, деп хабарлайды ZontNews.kz.
Ресми құжат президенттің ресми сайтында жарияланды.
Жарлыққа сәйкес Атамбаев «Қырғыз Республикасының Баатыры» жоғары атағынан, II дәрежелі «Манас» және «Данакер» ордендерінен, сондай-ақ «Даңқ» медалінен айырылды. Сонымен қатар экс-президентті марапаттау туралы бұған дейін шыққан барлық құжаттардың күші жойылды.
«Бас прокуратура жанындағы Сот орындаушылары қызметіне наградалар мен олардың құжаттарын тәркілеу тапсырылды. Кейіннен бұл жәдігерлер мемлекеттік наградалар қорына тапсырылады» – деп хабарлады президент әкімшілігі.
Алмазбек Атамбаев Қырғызстанды 2011 жылдың желтоқсанынан 2017 жылдың қарашасына дейін басқарды. Соңғы уақытта экс-президент пен қазіргі билік арасындағы саяси текетірес күшейген. Атамбаев Садыр Жапаровты елді дағдарысқа ұшыратты, жемқорлықты арттырды және сөз бостандығына қысым жасады деп айыптаған болатын.
Бұдан бөлек биыл Бішкектің Бірінші май аудандық соты Атамбаевты сырттай 11 жыл 3 айға бас бостандығынан айырып, мүлкін тәркілеу туралы үкім шығарған еді. Оған Бішкек ЖЭО-сын жаңғырту кезіндегі жемқорлық пен 2019 жылғы Қой-Таш оқиғаларына қатысты бірқатар айыптар тағылған.
Жаңалықтар
Тағы
Сізді де қызықтырады
Сұхбат
Бөлімге өтіңіз
Trends
Бөлімге өтіңіз
Сарапшы сөзі
Бөлімге өтіңіз
Әзірге түсініктеме жоқ!
Пікір қалдыратын бірінші адам болыңыз