Нұрдәулет Қилыбай некесіз туған ұлына қатысты жағдайды «өткеннің қателігі» деп атады

Фото көзі: gov.kz

Қаһар Бинахметов

Жел. 24, 2025, 11:40 Т.Ж.

Маңғыстау облысының әкімі Нұрдәулет Қилыбай бұрынғы мәслихат депутаты Ынташ Наурызованың әлеуметтік желілердегі мәлімдемелерінен басталған даулы жағдайға қатысты ресми пікір білдірді, деп хабарлайды ZontNews.kz.

Тамыз айында сот шешімімен облыс басшысы Наурызованың некесіз туған ұлының әкесі деп танылып, оған алимент төлеу міндеттелген болатын.

Өңір басшысы сот процесінің мән-жайына тоқталып, кейбір ақпарат құралдары таратқан деректерді нақтылады. Оның айтуынша, әкелікті анықтау туралы өтінішті сотқа өзі жолдаған.

«Біріншіден, сіздің әріптестеріңіз сот мені ДНҚ сараптамасы арқылы баланы мойындауға мәжбүрлегендей етіп жазды. Шын мәнінде, бұл мүлдем олай емес. Дұрысы, сот менің өзім берген өтінішімді қанағаттандырды. Бүгінде заң талаптарына сәйкес алимент төлеп отырмын» – деп мәлімдеді облыс әкімі.

Қилыбай бұл оқиғаны өз өміріндегі қателік деп қабылдайтынын және қазіргі уақытта баламен байланыс орнатпағанын ашық айтты.

«Иә, мұндай жағдай болды, ол үшін өкінемін. Бұл – кезінде жіберілген менің қателігім. Уақытты кері қайтару мүмкін емес. Қазір менің басты міндетім – аймақты дамыту ісімен айналысу» – деп нақтылады ол.

Сонымен қатар, журналистермен кездесу барысында әкім өзінің лауазымдық жалақысы туралы сұраққа жауап берді. Ол ай сайын бір миллион 900 мың теңге көлемінде еңбекақы алатынын хабарлады.

Даулы мәселе 2024 жылдың мамыр айында Ынташ Наурызованың президентке ашық хат жолдауынан кейін қоғамдық резонанс тудырған еді. Ол 2022 жылы туған баласының әкесі Нұрдәулет Қилыбай екенін айтып, оның тарапынан қысым жасалғанын мәлімдеген болатын. Нәтижесінде, ДНҚ сараптамасы негізінде әкелік фактісі ресми түрде бекітілді.

Бұл туралы не ойлайсыз?