Қазақстанда кімдерге екі миллион төлейді

Қазақстанда тау-кен өндірісіндегі ауысым басшысына шамамен 2,06 миллион теңге жалақы ұсынылып отыр. Ал киберқауіпсіздік маманы айына 2 миллион теңгеге жуық, кеніш директоры 1,63 миллион теңге таба алады. Мұндай бос жұмыс орындары Enbek.kz электрондық еңбек биржасында жарияланған, деп хабарлайды  ZontNews.kz.

Жұмыс іздеушілердің жалақыға қатысты талабы да жоғары. Әкімшілік бөлім басшылары айына шамамен 2,02 миллион теңге алғысы келеді. Жаңа өнімдерді әзірлеу жобаларының жетекшілері 1,84 миллион теңге, ал сату шеберлері 1,75 миллион теңге көлемінде жалақы күткен.

Қазіргі уақытта Enbek.kz платформасында 105 мыңнан астам бос жұмыс орны бар. Тамызда жұмыс берушілер 131,6 мың ұсыныс жариялаған. Бұл шілдедегі көрсеткіштен 25,8 пайызға көп. Осы кезеңде жұмыс іздеушілер 145,2 мың түйіндеме орналастырды.

Бос жұмыс орындары мен түйіндемелер арасындағы айырмашылық 2,5 есе қысқарған. Шілдеде олардың арасындағы алшақтық 36,6 мың болса, тамызда 13,6 мыңға дейін төмендеді.

2026 жылдың басынан бері электрондық еңбек биржасында 840,6 мың бос жұмыс орны және бір миллионнан астам түйіндеме жарияланған.

Тамызда мамандарға сұраныс ең көп білім беру саласында байқалды. Жаңа оқу жылы қарсаңында мектептер мен жоғары оқу орындары 61 мың бос жұмыс орнын ұсынған. Қызмет көрсету, денсаулық сақтау, өнеркәсіп, ауыл шаруашылығы және құрылыс салаларында да жұмысшылар белсенді іздестірілді.

Өңірлер арасында Астана мен Алматы көш бастап тұр. Екі қалада да шамамен 10 мыңнан бос жұмыс орны жарияланған.

Бұған дейін экономист Руслан Сұлтанов Қазақстанның еңбек нарығындағы жұмыссыздық пен маман тапшылығының қатар қалыптасуын түсіндірген еді. Оның айтуынша, экономикаға қажет мамандар мен жұмыс іздеп жүрген азаматтардың біліктілігі бір-біріне сәйкес келе бермейді. Соның салдарынан елдегі бос жұмыс орындарының 30–40 пайызы жабылмай қалып, Қазақстан жыл сайын шамамен 300 мың шетелдік жұмысшыны тартады.