Бас прокуратурада Активтерді қайтару қызметі құрылды

Фото көзі: gov.kz

Қаһар Бинахметов

Қаң. 26, 2026, 11:41 Т.Ж.

Қазақстанның Бас прокуратурасында заңсыз иемденілген активтерді мемлекетке қайтарумен айналысатын арнайы қызмет құрылды, деп хабарлайды ZontNews.kz.

Ведомство басшысының 2026 жылғы 6 қаңтардағы бұйрығымен бекітілген жаңа ереже осы құрылымның өкілеттіктерін, ішкі иерархиясы мен стратегиялық міндеттерін айқындап берді.

Жаңа қызмет Бас прокуратураның дербес құрылымдық бөлімшесі мәртебесіне ие. Оның құрамында мониторинг пен талдау басқармасы, активтерді қайтару шараларын іске асыру бөлімі, сондай-ақ халықаралық ынтымақтастық пен ұйымдастыру жұмыстарына жауапты көмекшілер қарастырылған. Құрылымның басты мақсаты — заңсыз шығарылған капиталды анықтау, оның шығу төркінін тексеру және мемлекет меншігіне қайтару процесін құқықтық сүйемелдеу.

«Жаңа қызметтің функцияларына мемлекет атынан активтерді қайтару жөніндегі іс-қимылды жүзеге асыру, мүдделес тұлғалар туралы ақпаратты жинау және өңдеу, сондай-ақ активтердің құнын бағалау мен аудит жүргізу жұмыстары кіреді» – деп хабарлады Бас прокуратура.

Құзыретті органға мемлекеттік мекемелер мен квазимемлекеттік сектор субъектілерінен кез келген қажетті мәліметті сұратуға, сондай-ақ тиісті тұлғаларға қатысты сотқа дейінгі тергеп-тексеру амалдарын бастауға өкілеттік берілген. Бұған қоса, жаңа құрылым мүлікті өз еркімен қайтару туралы өтініштерді қарап, олар бойынша процессуалдық шешімдер қабылдайтын болады.

Бұл институционалдық өзгеріс президенттің 2025 жылғы қыркүйектегі құқық қорғау жүйесін трансформациялау туралы бастамасының жалғасы болып табылады.

Естеріңізге сала кетейік, өткен жылдың соңында Активтерді қайтару комитеті қайта ұйымдастырылып, Бас прокуратура жанынан Инвесторлардың құқықтарын қорғау комитеті құрылған болатын. Ендігі кезекте жаңа қызмет заңсыз активтерді қайтару жөніндегі арнайы комиссияның жұмысын техникалық әрі құқықтық тұрғыдан қамтамасыз етеді.

Бұл туралы не ойлайсыз?