Алматыда актер Мұрат Бисенбинмен қоштасу рәсімі өтті

Фото көзі: ашық дереккөздерден

Қаһар Бинахметов

Қаң. 9, 2026, 5:26 Т.Қ.

Алматыдағы Орталық мешітте танымал актер Мұрат Бисенбиннің жаназа намазы оқылып, жақындары мен әріптестері оны жер қойнауына тапсырды. 53 жасқа қараған шағында дүниеден өткен өнер иесімен қоштасуға оның туған-туыстары мен шығармашылықтағы серіктестері жиналды, деп хабарлайды ZontNews.kz.

Марқұмның әкесі Болат Бисенбиннің айтуынша актердің денсаулығы инсульт алғаннан кейін күрт нашарлаған. Ол біраз уақыт оңалту орталығында ем алғанымен, дерт асқына түскен.

«Инсульттен кейін жағдайының ауырлап кеткенін сездік. Ол тамақ ішуден қалып, дәретке шығуы да қиындаған еді. 8 қаңтар күні таңертең Мұраттың қаза болғаны туралы қаралы хабар жетті» – деді Болат Бисенбин.

Актердің қызы Диана әкесінің қатерлі ісікпен бір жарым жыл бойы күрескенін мәлімдеді. Соңғы айларда сырқаттың асқынуына байланысты онкологиялық емді жалғастыру мүмкін болмаған. Себебі желтоқсан айында актер екі мәрте инсульт алып, ауруханаға түскен еді.

«Соңғы бірнеше ай ең ауыр кезең болды. Дәрігерлер үш ай бойы ешқандай ем жасауға болмайтынын ескертті. Осының бәрі оған өте ауыр тиді. 8 қаңтарға қараған түні әкем үйде көз жұмды» – деп мәлімдеді Диана.

Диана әкесінің отбасына бауырмал, спорт пен өнерге құштар жан болғанын ерекше атап өтті. Сондай-ақ ол әкесі ауырып жатқанда моральдық және материалдық тұрғыдан қолдау көрсеткен барша жанашырларға алғыс айтты. Мұрат Бисенбиннің артында үш перзенті қалды.

Болат Бисенбин ұлының тұлғалық қасиеттеріне тоқталып, оның ешқашан ішімдік пен темекіге әуес болмағанын, үнемі спортпен шұғылданғанын және ағылшын тілін жетік меңгергенін айтты.

«Институтты бітіріп, ағылшын тілін жақсы білетін. Ата-ана үшін өз перзентін соңғы сапарға аттандырудан асқан қасірет жоқ. Ол бізді жерлеуі керек еді, алайда бәрі керісінше болды. Оның шеберлігі мен сомдаған рөлдеріне халықтың өзі бағасын береді» – деп айтты актердің әкесі.

Мұрат Бисенбин Алматыдағы «Кеңсай-2» зиратына жерленді. Актер бір жылдан астам уақыт қатерлі ісікпен арпалысып, соңында инсульт салдарынан туындаған асқынулардан қайтыс болды.

Бұл туралы не ойлайсыз?