Ақтаудағы жұмбақ моншаның орны анықталды

Әлеуметтік желіде Ақтаудағы бұрынғы президент резиденциясының аумағында орналасқан ерекше моншаның суреттері тарады. Нысанның нақты қай жерде тұрғанын Ulysmedia.kz журналистері анықтады, деп хабарлайды  ZontNews.kz.

Каспий теңізінің жағалауындағы пирске салынған құрылыс сыртқы пішіні жағынан кемеге ұқсайды. Желіде жарияланған кадрлардан ағашпен қапталған бу бөлмесін, иллюминатор тәрізді дөңгелек терезелерді, баспалдақтар мен металл тұтқаларды көруге болады. Ғимаратта кафель төселген жеке бөлме де бар.

Ақтау тұрғындары суреттегі орынды бұрынғы президент резиденциясының аумағындағы нысан деп таныған. Осыдан кейін желі қолданушылары оны «Назарбаевтың моншасы» деп атай бастады. Алайда моншаны Қазақстанның бұрынғы президенті Нұрсұлтан Назарбаев пайдаланғаны туралы ресми мәлімет жоқ.

Ulysmedia.kz редакциясы ақпаратты тексеру үшін аталған аумақты дронмен түсірген. Әуеден жасалған кадрлардан Каспий жағалауындағы шығанақ, теңізге қарай созылған пирс және оның үстіндегі әлеуметтік желіде тараған суреттерге ұқсас нысан байқалады.

Бұрынғы резиденция орналасқан аумақ көп жыл бойы қатаң күзетіліп, жұртшылық үшін жабық болған. Каспий жағалауындағы жердің жалпы көлемі шамамен 225 гектарды құрайды. Оның ішінде жолдар, ғимараттар, айлақтар, шығанақ және басқа да нысандар бар.

2002–2004 жылдары жағалаудағы жер телімдері «Маңғыстаумұнайгаз» АҚ-на берілген. Кейін аумақтың едәуір бөлігі ондағы құрылыстарымен бірге Oil Real Estate ЖШС-нің меншігіне өткен.

2023 жылы сот жер учаскелерінің заңсыз берілгенін анықтады. Істі қарау кезінде жер комиссиясының қорытындысы мен жерге орналастыру жобасы болмағаны, сондай-ақ аумақтың тиісті рәсімдер мен сауда-саттық өткізілместен берілгені белгілі болды. Сот шешімінен кейін 225 гектар жер мемлекет меншігіне қайтарылды.

Нұрсұлтан Назарбаев Ақтаудағы бұл резиденцияға бірнеше рет барған. 2002 жылғы 6 шілдеде ол өзінің 62 жасқа толған күнінде Ресей және Орталық Азия мемлекеттерінің басшыларын Ақтауда қабылдаған.

Бейресми кездесуде өңірлік қауіпсіздік, энергетика және көлік мәселелері талқыланғанымен, қорытындысында ешқандай ресми құжатқа қол қойылмаған. Кейін мемлекет басшылары Ақтауды аралап, теңіз портына барған және тікұшақпен Кендірлі демалыс аймағына аттанған. Дегенмен сол кездегі қонақтар немесе Назарбаевтың өзі пирстегі моншаны пайдаланғаны туралы расталған ақпарат жарияланбаған.

Жер мемлекетке қайтарылғаннан кейін Маңғыстау облысының билігі аумақты пайдалану жолдарын қарастыра бастады. Мұнда балаларға, спортқа, мәдениет пен туризмге арналған нысандар, мешіт, теңіз вокзалы және қоғамдық демалыс аймағын салу ұсынылған.

Ақтау әкімдігінің мәліметінше, бұрынғы президент резиденциясының аумағында 10 мың көрерменге арналған жаңа стадион бой көтереді. Спорт аренасын UEFA талаптарына сәйкес салу жоспарланып отыр. Стадион 225 гектар жердің бір бөлігін ғана қамтиды, ал аумақтың қалған бөлігі қалай пайдаланылатыны әзірге белгісіз.