Air Astana жаңа Boeing ұшақтарына қатысты рекордтық келісімді рәсімдеуге кірісті

Фото көзі: Boing

Қаһар Бинахметов

Қар. 20, 2025, 4:32 Т.Қ.

Президент Қасым-Жомарт Тоқаевтың Вашингтонға сапарынан кейін тараптар шамамен 17 млрд доллар көлеміндегі бірқатар келісімге қол қойды. Соның ішінде ең ірілерінің бірі — Boeing 787-9 үлгісіндегі 15 ұшақты лизингке алу туралы келісім. Осыған байланысты Air Astana мәмілені рәсімдеуге дайындық бастағанын хабарлады, деп жазады ZontNews.kz.

Авиакомпания 15 қаңтарда Алматыда акционерлер жиналысын өткізетінін мәлімдеді. Күн тәртібіндегі жалғыз мәселе — Boeing 787-9 ұшақтарына қатысты мәмілені бекіту.

KASE алаңында жарияланған жазбада келісімнің құны мен нақты форматы көрсетілмеген. Мәміленің лизинг арқылы жүзеге асуы мүмкін. Құжатта бағалау компания активтерінің үлесі ретінде ұсынылған.

2024 жылдың қаржылық есебіне сәйкес, Air Astana активтерінің баланстық құны 952 млрд теңге. Бұл болашақ лизинг компания активтерінің шамамен жартысын қамтуы ықтимал екенін көрсетеді.

Boeing 787-9 бағасы белгісіз, себебі өндіруші 2019 жылдан бері прайс-парақ жарияламайды. Сол жылы бір ұшақ 292,5 млн доллар деп көрсетілген. Сол бағамен жарты триллион теңгеге төрт ұшақ сатып алуға болар еді. 2025 жылы инфляция мен баға өсімін ескерсек, бұл сома шамамен үш ұшаққа ғана жетеді.

Air Astana 2022 жылы келісімшартқа енгізілген үш Boeing 787-9 ұшағын әлі алмады. Жеткізілімдер 2025 жылдың басынан 2026 жылдың көктеміне дейін жоспарланған еді, бірақ өндіруші тарапындағы кідірістер кесірінен мерзім бірнеше рет кейінге қалды.

2022 жылдың қарашасында Air Lease Corporation Air Astana үшін үш Boeing 787-9 ұшағын ұзақмерзімді лизингке беретінін хабарлаған. Жеткізілімдер 2025 жылға белгіленгенімен, кейін олар 2025 жылдың соңына, одан әрі 2026 жылдың алғашқы тоқсанына, кейін 2026 жылдың екінші жартысына шегерілді. Aviationweek порталы Қазақстаннан АҚШ-қа тікелей рейстердің кешігуін осы ұшақтардың әлі келмегенімен байланыстырады.

Бұл туралы не ойлайсыз?