Жас спортшының ісі тергеліп жатыр

Полиция кәмелетке толмаған спортшыға қатысты зорлық-зомбылық дерегі бойынша тергеу жүргізіп жатыр. Қыздың айтуынша, ол екі жыл бойы жаттықтырушысының қысымына ұшыраған. Сонымен қатар оның анасы мен ағасына қатысты да қылмыстық іс қозғалған, деп хабарлайды ZontNews.kz.

Жасөспірімнің сөзінше, оқиға екі жыл бұрын, өзі 14 жаста болған кезде басталған. Сол уақытта 38 жастағы жаттықтырушы команданы допты хоккей жарысына қатысу үшін Талдықорғанға алып барған. Басқа спортшылар қалаға серуендеуге кеткенде, қыз қонақүйде жалғыз қалған.

Оның айтуынша, жаттықтырушы берген сусынды ішкеннен кейін есінен танып, таңғы уақытта ер адамның жанында оянған. Қыз болған жағдайды есіне түсіре алмағанын және қатты қорыққанын жеткізді.

Жасөспірім жаттықтырушының оқиғаны видеоға түсіріп, оны жариялаймын деп қорқытқанын айтады. Осы қысымның салдарынан ол болған жайтты ұзақ уақыт бойы ешкімге жеткізе алмаған. Қыздың мәлімдеуінше, жаттықтырушы оны және туыстарын түрмеге отырғызатынын айтып қоқан-лоқы көрсеткен. Мұндай жағдай шамамен екі жылға созылған. Сондай-ақ ол жаттықтырушының ақша үшін өзін басқа ер адамдармен таныстырғанын мәлімдеді.

Кейін жасөспірім бәрін туыстарына айтып, отбасы полицияға жүгінген. Алайда қыздың анасы мен ағасына қатысты адам ұрлау күдігі бойынша тергеу басталды. Қазір анасы үйқамақта, ал ағасы уақытша ұстау изоляторында отыр.

Жәбірленушінің әпкесі туыстарына қатысты қылмыстық қудалауды әділетсіз деп санайтынын айтты. Оның сөзінше, отбасы күдіктіге күш қолданбай, одан қаладан кетуді талап еткен.

Істі облыстық полиция департаменті тергеп жатыр. Ведомствоның тергеу басқармасының бастығы Бауыржан Сәулебековтің мәліметінше, жаттықтырушы мен оның танысы ұсталып, сот санкциясымен қамауға алынған. Тергеу барысы полиция департаменті басшылығының ерекше бақылауына алынды.

Кәмелетке толмаған қыздың туыстары істің сотқа жіберіліп, оған қатысы бар адамдардың жауапқа тартылуын талап етіп отыр. Күдіктілердің, сондай-ақ қыздың анасы мен ағасының кінәсі сот үкімі заңды күшіне енгенге дейін дәлелденген болып есептелмейді. Екі іс бойынша да түпкілікті шешімді сот шығарады.