Ресей 42 мың сарбазынан айырылды

Ресей әскері күздің басына дейін бүкіл Донбасты басып алу жөніндегі мақсатына жете алмады. Тамызда шабуыл қарқыны бәсеңдеп, Ресей армиясы Украина күштерінің қарсы әрекеттері нәтижесінде басып алған аумағынан көбірек жерден айырылған. Бұл туралы Соғысты зерттеу институтының (ISW) есебіне сүйенген ZontNews.kz. хабарлайды.

ISW мәліметінше, тамызда Ресей бөлімшелері шамамен 90,35 шаршы шақырым аумақты бақылауына алған. Ал Украина әскерінің қарсы шабуылдары салдарынан Ресей кемінде 129,8 шаршы шақырым жерден айырылған. Сарапшылар Украина күштері қайтарған аумақтың нақты көлемі бұдан да көп болуы мүмкін екенін айтады.

Бұл көрсеткіш былтырғы нәтижемен салыстырғанда айтарлықтай төмен. 2025 жылғы тамызда Ресей әскері 505 шаршы шақырымнан астам аумақты басып алған еді. Осылайша, бір жыл ішінде Ресей бақылауына өткен жаңа аумақ көлемі бес еседен астам қысқарған.

ISW бағалауынша, тамызда Ресейдің шамамен 42 020 әскери қызметкері қаза тапқан немесе жараланған. Шілдеде бұл көрсеткіш 42 860 адам деңгейінде бағаланған. Осылайша, Ресей армиясының ай сайынғы шығыны екінші ай қатарынан 40 мыңнан асып отыр.

Есеп бойынша тамызда Ресей әскері басып алған әрбір шаршы шақырымға орта есеппен қаза тапқан немесе жараланған 465 әскери қызметкерден келген.

Ресей күштері негізінен Донецк облысында ілгерілеген. Алайда бірнеше айдан бері шайқас жүріп жатқан, Украина қорғанысы үшін маңызды Константиновка қаласын толық бақылауына ала алмаған. ISW дерегінше, қазір Ресей қаланың шамамен 72 пайызын бақылап отыр.

Шабуыл қарқынының бәсеңдеуі әскер қатарын жаңа адамдармен толықтыру қиындаған кезеңге тұспа-тұс келді. Германияның Халықаралық қатынастар және қауіпсіздік институтының сарапшысы Янис Клюгенің бағалауынша, Ресей 2026 жылы ай сайын 30 мыңнан астам жаңа келісімшарт қызметкерін тұрақты түрде тарта алмай отыр. Жыл басында бұл көрсеткіш шамамен 24 мың адамға дейін төмендеген.

ISW сарапшылары қазіргі шығын көлемі мен әскерге адам тарту қарқыны сақталса, Ресейдің қосымша шараларсыз шабуылды жалғастыру мүмкіндігі барған сайын белгісіз бола түсетінін атап өтті.

Наурызда Ресей армиясының шығыны шамамен 31 960 адамға бағаланған еді. Украина билігі бұған дейін Ресей әскерінің ай сайынғы шығынын 50 мың адамға дейін жеткізуді мақсат еткенін мәлімдеген.

Шабуылдың баяулауы Кремль үшін әскери ғана емес, саяси тұрғыдан да маңызды. Ресей басшылығы жеңістің жақындағанын бірнеше рет мәлімдеген. Ал көктемде әскери қолбасшылыққа Донбасты күзге дейін толық басып алу міндеті қойылған еді. Алайда қыркүйектің басына қарай Ресей әскері өңірді толығымен бақылауға ала алмады.

ISW-дың тамыз айындағы деректері Ресейдің шабуылды жалғастыруға жұмсап жатқан ресурстары мен қол жеткізген аумақтық нәтижелері арасындағы алшақтықтың артып келе жатқанын көрсетеді.