Мешіттегі атыс: жасөспірімге айып тағылды

Солтүстік Каролина штатының үлкен алқабилер соты 18 мамырда Сан-Диегодағы мешітке жасалған шабуылға қатысы бар деген күдікпен 17 жастағы Сара Линдси Сантьягоға айып тақты, деп хабарлайды ZontNews.kz. 

Атыс салдарынан үш адам қаза тапқан. Тергеу нұсқасы бойынша, бойжеткен шабуыл жасаушыларға көмектесуге келіскен. Ол қылмысты тікелей эфирде көрсетіп, бейнежазбаны таратуға және шабуылдан кейін қылмыскерлердің манифесін жариялауға тиіс болған.

Форсайт округінің прокуроры Джим О’Нил айыптың штат деңгейінде тағылғанын мәлімдеді. Солтүстік Каролина заңнамасына сәйкес, Сантьяго кәмелетке толған адам ретінде сотталуы мүмкін. Кінәсі дәлелденсе, ол мерзімінен бұрын босату құқығынсыз өмір бойына бас бостандығынан айырылуы ықтимал. Бойжеткен өткен аптада қамауға алынған.

Атыс кезінде 51 жастағы күзетші Амин Абдулла, 78 жастағы қараушы Мансур Казиха және Сан-Диего ислам орталығы мұғалімінің 57 жастағы күйеуі Надир Авад қаза тапты.

Тергеу мәліметінше, олар құрбандар санының артуына жол бермеген. Шабуыл кезінде мешіт жанындағы мектепте шамамен 140 бала болған.

Шабуыл жасады деген 18 жастағы Калеб Васкес пен 17 жастағы Кейн Кларк оқиғадан кейін көліктің ішінде өз-өзіне қол жұмсаған. Тергеушілер олардың еврей ғибадатханасы мен оқушыларының басым бөлігі афроамерикалықтардан тұратын мектепке де шабуыл жасауды жоспарлағанын анықтаған.

Прокурордың сөзінше, шабуыл жасаушылар әртүрлі мәдениет пен дін өкілдеріне өшпенділік таратқан астыртын субмәдениетпен байланыста болған.

Айыптау материалдарына сәйкес, Сантьяго шабуылды тікелей эфирде көрсетуге, жазбаны таратуға және кейін қылмыскерлердің манифесін жариялауға алдын ала келіскен. Тергеушілер тікелей эфирді үш адамның көргенін анықтады. Олардың бірі Сантьяго болған. Қалған екі көрерменнің жеке басы анықталды ма және оларға айып тағыла ма – әзірге белгісіз.