2026 жылы 200 мың қазақстандық педагог жасанды интеллект құралдарын меңгереді
2026 жылы елімізде 200 мың педагог жасанды интеллект құралдарын қолдануды үйренеді. Бұл олардың күнделікті жұмыс жүктемесін азайтып, оқу процесінің тиімділігін арттыруға бағытталған, деп хабарлайды ZontNews.kz.
Мемлекет басшысының тапсырмасына сәйкес, білім беру саласына жасанды интеллект енгізу бойынша кешенді жұмыстар жүргізіліп жатыр. Қазір QazTech платформасының негізінде Ұлттық білім беру дерекқоры жаңғыртылуда. Ол электрондық күнделіктер үшін бірыңғай қоймаға айналып, оқушылардың цифрлық профильдерін қалыптастыруға мүмкіндік береді.
Сонымен қатар Ұлттық білім беру платформасын құру жоспарланып отыр. Бұл платформада білім беру саласындағы барлық сервистер мен мемлекеттік қызметтер біріктіріледі. Нәтижесінде электрондық күнделіктер жүргізуден бастап деректер мен жасанды интеллект негізінде таланттарды басқару жүйесіне көшу жүзеге асады.
Пилоттық жобаның негізгі мақсаты – ChatGPT жүйесін білім беру процесіне енгізу арқылы оқыту сапасын арттыру, педагогтердің жұмыс тиімділігін күшейту және зерттеу әлеуетін дамыту. Жоба жасанды интеллект көмегімен академиялық процестерді автоматтандыруды да көздейді.
Меморандум аясында Қазақстан Республикасы Оқу-ағарту министрлігінің қажеттіліктері үшін ChatGPT Edu бойынша 100 мың лицензия бөлінді. Оның 5 мыңы мектепке дейінгі ұйымдарға, 85 мыңы орта білім беру ұйымдарына, ал 10 мыңы колледждерге беріледі. Жылдың екінші жартысында лицензиялар қайта бөлініп, тағы 100 мың педагогке ұсынылады.
Осылайша, 2026 жылы барлығы 200 мың педагог жасанды интеллект құралдарын тәжірибе жүзінде қолдану дағдыларын меңгереді.
Жоба аясында әрбір мұғалім өзіне арналған «ақылды ассистентке» ие болады. ChatGPT Edu бірнеше минут ішінде сабақ жоспарын әзірлеуге, тапсырмалар мен тесттер құрастыруға, оқу материалдарын әртүрлі деңгейдегі оқушыларға бейімдеуге, сондай-ақ оларды қазақ, орыс және ағылшын тілдерінде дайындауға мүмкіндік береді.
Сонымен қатар бұл құрал мұғалімдерге күрделі тақырыптарды қарапайым тілмен түсіндіруге, сабақ форматын пікірталасқа, бірлескен жобаға немесе зерттеу жұмысына айналдыруға көмектеседі.
ChatGPT Edu бағалау критерийлерін әзірлеуге, оқушылардың жұмыстарын алдын ала талдауға және әрбір білім алушыға жеке кері байланыс дайындауға да қолдау көрсетеді. Дегенмен қорытынды бағаны әрқашан педагогтің өзі қояды.
Платформа мұғалімдердің кәсіби дамуына да мүмкіндік береді. Олар заманауи оқыту әдістерін меңгеріп, оқу курстарын жаңартып, әдістемелік материалдар дайындап, жаңа цифрлық және жасанды интеллект технологияларын игере алады.
Қоғам тынысы
Тағы
Сізді де қызықтырады
Сұхбат
Бөлімге өтіңіз
Trends
Бөлімге өтіңіз
Сарапшы сөзі
Бөлімге өтіңіз
Әзірге түсініктеме жоқ!
Пікір қалдыратын бірінші адам болыңыз