Тоқаев Қазақстан халқына Жолдауын 28 қазанда жариялайды

Қазақстан Президенті Қасым-Жомарт Тоқаев 28 қазан күні таңертең Қазақстан халқына жыл сайынғы Жолдауын жариялауды жоспарлап отыр, деп хабарлайды ZontNews.kz

Мемлекет басшысы бұл туралы X әлеуметтік желісіндегі парақшасында мәлімдеді.

«28 қазан күні таңертең Қазақстан халқына жыл сайынғы Жолдауымды жариялауды жоспарлап отырмын. Қазіргі уақытта осы маңызды құжаттың мәтінімен жұмыс істеп жатырмын», – деп жазды Президент.

Бұған дейін Қасым-Жомарт Тоқаев дәстүрлі Жолдауды қыркүйектен қазан айына ауыстыру туралы шешім қабылдаған еді. Бұл жөнінде ол 11 қыркүйекте VI Дүниежүзілік көшпенділер ойындарының жеңімпаздары мен жүлдегерлерін марапаттау рәсімінде мәлімдеді. Алайда сол кезде нақты күнін атаған жоқ.

«Қазан айында Конституцияның 46-бабына сәйкес Қазақстан халқына Жолдауымды жариялап, алдағы кезеңге арналған мақсат-міндеттерді айқындаймын», – деген еді Мемлекет басшысы.

Жолдаудың мерзімін өзгерту 15 наурызда өткен референдумда жаңа Конституцияның қабылдануынан кейін мемлекеттік басқару жүйесінің ауқымды түрде жаңартылуына байланысты. Тамыз айында бір палаталы Құрылтайдың алғашқы сайлауы өтіп, содан кейін мемлекеттік органдардың жаңартылған жүйесін қалыптастыру басталды.

Президенттің бұған дейінгі түсіндіруінше, Жолдау жаңа парламент пен үкімет жасақталғаннан кейін жариялануы тиіс. Бұл заң шығарушы және атқарушы билікке қойылған міндеттерді бірлесіп жүзеге асыруға бірден кірісуге мүмкіндік береді.

Еске салайық, Мемлекет басшысының бұған дейінгі Жолдауы 2025 жылғы 8 қыркүйекте жарияланған болатын. Ол жасанды интеллектіні дамыту және Қазақстанды цифрлық трансформациялау мәселелеріне арналды. Негізгі саяси бастамалардың бірі – бір палаталы парламентке көшу туралы ұсыныс болды. Кейін бұл бастама 2026 жылғы ауқымды конституциялық реформаның негізіне айналды.

Осылайша, алдағы Жолдау жаңа Конституция күшіне енгеннен және бірінші шақырылымдағы Құрылтай жұмысын бастағаннан кейін жарияланатын алғашқы бағдарламалық құжат болмақ. Президент Жолдауда қандай мәселелер көтерілетінін әзірге нақтылаған жоқ.