Президент тапсырмасы: Үкіметке нақты нәтиже талап етілді
10 ақпанда Астанада Мемлекет басшысы Қасым-Жомарт Тоқаевтың төрағалығымен Үкіметтің кеңейтілген отырысы өтті. Жиында елдің алдағы даму кезеңіне арналған негізгі стратегиялық бағыттар айқындалып, әлеуметтік-экономикалық саясаттың тиімділігін арттыру, мемлекеттік басқару сапасын жақсарту және халықтың әл-ауқатын нақты өсіру бойынша маңызды міндеттер жүктелді, деп хабарлайды ZontNews.kz
Президент мемлекеттік органдардың жұмысында формализмге жол бермеуді, нақты нәтижеге бағытталған шешімдер қабылдауды талап етті. Сондай-ақ Үкімет пен шенеуніктерге «жалған есеп емес, нақты нәтиже керек» екенін қатаң ескертті.
Келесі күні, 11 ақпанда Премьер-министр Олжас Бектенов Үкімет мүшелеріне Мемлекет басшысы жүктеген тапсырмаларды іске асыру бойынша нақты міндеттерді белгіледі.
Білім беру: қаржы тиімділігі мен кадр даярлау
Білім саласында бюджет қаражатын тиімді пайдалану басты басымдық ретінде айқындалды. Білім және ғылым министрлігі мен Қаржы министрлігіне өңірлік әкімдіктермен бірлесіп, бір ай ішінде мектепке дейінгі, орта, техникалық және жоғары білім беру салаларындағы шығындарды оңтайландыру жөнінде ұсыныстар енгізу тапсырылды.
Сонымен қатар еңбек нарығы сұранысына сай кадр даярлау мәселесіне ерекше көңіл бөлінді. 1 сәуірге дейін Ұлттық мамандықтарды трансформациялау орталығын құру жоспарланып отыр. Бұл құрылым экономиканың жаңа талаптарына сәйкес мамандықтар картасын әзірлеп, білім беру бағдарламаларын нақты нарық қажеттілігіне бейімдеуге тиіс.
Денсаулық сақтау: цифрландыру және ашықтық
Денсаулық сақтау саласында цифрландыру үдерісін жеделдету міндеті қойылды. 1 сәуірге дейін Бірыңғай медициналық деректер қоймасын енгізуді аяқтау және Бірыңғай мемлекеттік медициналық ақпараттық жүйені әзірлеу тапсырылды.
Бұл шаралар медициналық қызмет сапасын арттырумен қатар, қаржыландырудың ашықтығын қамтамасыз етуге және сыбайлас жемқорлық тәуекелдерін азайтуға бағытталған. Сондай-ақ Әлеуметтік медициналық сақтандыру қорының қызметін толық цифрландыру міндеттелді.
Әлеуметтік көмек: нақты мұқтажға – нақты қолдау
Әлеуметтік саясатты жаңғырту аясында отбасының цифрлық картасы негізінде үй шаруашылықтарының әлеуметтік цифрлық профилін қалыптастыру тапсырылды. Сонымен бірге Бірыңғай цифрлық платформа құрып, «Әлеуметтік әмиян» жүйесінде барлық қолдау түрлерін біріктіру көзделіп отыр.
Бұл тәсіл әлеуметтік көмекті нақты мұқтаж азаматтарға бағыттауға, артық шығындарды азайтуға және мемлекеттік қаражаттың тиімділігін арттыруға мүмкіндік береді.
Негізгі өлшем – халықтың әл-ауқаты
Үкімет отырысын қорытындылаған Олжас Бектенов қабылданатын шешімдер батыл әрі жедел жүзеге асырылуы тиіс екенін атап өтті.
«Халықтың табысы мен әл-ауқатының өсуі – біздің жұмысымыздың басты көрсеткіші болуы керек», – деді Премьер-министр.
Жалпы, алға қойылған міндеттер әлеуметтік салаларды жүйелі жаңғыртуға, цифрландыру арқылы басқару сапасын арттыруға және азаматтардың өмір сүру деңгейін нақты жақсартуға бағытталған. Ендігі басты сынақ – осы тапсырмалардың сапалы әрі уақытылы орындалуы.
Жаңалықтар
Тағы
Сізді де қызықтырады
Сұхбат
Бөлімге өтіңіз
Trends
Бөлімге өтіңіз
Сарапшы сөзі
Бөлімге өтіңіз
Әзірге түсініктеме жоқ!
Пікір қалдыратын бірінші адам болыңыз