Қазақстандық балалардан тісжегі жиі анықталды

Қазақстанда мектеп оқушылары арасында ауруларды ерте анықтау және олардың алдын алу жұмыстары күшейтіліп жатыр, деп хабарлайды ZontNews.kz. Zakon.kz-ке сілтеме жасап.

Денсаулық сақтау министрлігінің мәліметінше, 2026 жылдың алғашқы жартысында 3,6 миллион бала профилактикалық медициналық тексеруден өткен. Нәтижесінде 302 мың баладан түрлі ауру анықталып, 119 мыңнан астамы динамикалық бақылауға алынған.

Балалар арасында тісжегі, анемия және көру қабілетінің бұзылуы жиі кездеседі. Медициналық тексерулер барысында мектеп оқушыларынан тісжегінің 80 169 жағдайы анықталған.

Министрлік тісжегінің пайда болуына әсер ететін негізгі факторлардың бірі – құрамында қант бар тағамдар мен сусындарды жиі тұтыну екенін атап өтті.

Аурудың алдын алу үшін ауыз қуысының тазалығын тұрақты сақтау, тәтті сусындар мен тағамдарды шектеу, таза ауызсу ішу және дәрігерге уақтылы қаралу қажет.

Ведомствоның хабарлауынша, 2025 жылдан бастап білім беру мекемелерінде мектептегі тамақтанудың жаңа стандарты қолданыла бастады. Құжат балалардың күнделікті рационындағы қант пен тұз мөлшерін азайтуды көздейді.

«Болашаққа сау тіспен» жобасы аясында екі жылдың ішінде 166 профилактикалық стоматологиялық кабинет ашылды. Олардың жұмысы оқушыларға ауыз қуысына дұрыс күтім жасауды үйретуге және тіс ауруларының алдын алуға бағытталған.

Сонымен қатар медициналық тексерулер жүйесіне цифрлық технологиялар мен жасанды интеллект енгізіліп жатыр. 2027 жылдан бастап ата-аналарға балаларының алдағы тексерулері туралы SMS-хабарлама жіберу жоспарланған. Бұл отбасыларға медициналық тексеруден уақытында өтуге мүмкіндік береді.