Қазақстанда таксиге сұраныс үш есе артты: inDrive комиссияны 1%-ға түсірді

Қазақстанда такси мен жеткізу қызметіне тапсырыс саны күрт өскеннен кейін inDrive жүргізушілер үшін арнайы шарттар енгізді. Компания еліміздің 19 ірі қаласында, соның ішінде Астана мен Алматыда комиссияны 1%-ға дейін төмендетті, деп хабарлайды ZontNews.kz. DKNews.kz-ке сілтеме жасап.

inDrive бас директоры Арсен Томскийдің мәліметінше, жексенбі күні таңертең бірнеше сағат ішінде сапарлар мен жеткізу қызметіне сұраныс әдеттегі жексенбілік көрсеткішпен салыстырғанда шамамен үш есе артқан.

Тапсырыс санының көбеюі сервистің жұмысына түсетін жүктемені арттырды. Әсіресе әуежайлардың маңында сапар құны айтарлықтай қымбаттаған.

Қолжетімді көліктер санын көбейту және жолаушылардың күту уақытын қысқарту мақсатында компания жүргізушілерден алынатын комиссияны 1%-ға дейін азайтты. Сонымен қатар жаңа жүргізушілерді тексеретін қызметкерлер саны екі есе көбейтілді.

Компания өкілдерінің айтуынша, арнайы шарттар енгізілгеннен кейін жүргізушілерден ондаған мың өтінім түскен. Олардың бір бөлігі тапсырыс орындауға жедел кіріскен. Соның нәтижесінде бірнеше сағаттан кейін сапар бағасы төмендей бастағанымен, кей жерлерде құны әлі де әдеттегіден жоғары болып отыр.

inDrive сервисінде сапар құнын жолаушы мен жүргізуші өзара келіседі. Жолаушы бастапқы бағаны ұсынады, ал жүргізуші оны қабылдауға немесе қарсы ұсыныс жасауға құқылы. Екі тарап келіскеннен кейін ғана тапсырыс расталады.

Бос көліктерге қарағанда тапсырыс саны көп болған кезде жолаушылар жүргізушіні жылдам табу үшін жоғары баға ұсынуы мүмкін. Компания сұраныс артқан кезеңде кейбір бағыттардағы сапарлардың қымбаттауын осы жағдаймен түсіндірді.

inDrive бағаның шамадан тыс өсуіне шектеу енгізіп, жағдайды бақылауды жалғастырып жатқанын мәлімдеді. Алайда 1% мөлшеріндегі комиссияның қанша уақыт қолданылатыны және тарифтердің қашан толық қалыпқа келетіні айтылған жоқ.