Қазақстанда автолизинг мөлшерлемесіне шек қойылды

Қазақстанда жеке тұлғаларға арналған автолизинг келісімдері бойынша тиімді мөлшерлеменің шекті деңгейі белгіленді, деп хабарлайды ZontNews.kz. Tengri Auto-ға сілтеме жасап.

Жаңа талаптарға сәйкес, құны 20 миллион теңгеге дейінгі көліктер үшін мөлшерлеме жылдық 36 пайыздан, ал 20 миллион теңгеден қымбат автомобильдер үшін 46 пайыздан аспауы тиіс. Егер лизинг беруші банк болса, шекті мөлшерлеме жылдық 35 пайыз болып белгіленді.

Құжатта клиенттен алынуы мүмкін қосымша төлемдер де көрсетілген. Олардың қатарында өтінімді қарау комиссиясы, бастапқы жарна, міндетті және ерікті сақтандыру, көлікті жөндеу және күтіп ұстау шығындары, сондай-ақ мониторинг жүйелері мен ұрлыққа қарсы құрылғыларға байланысты төлемдер бар.

Кейбір жағдайларда клиент эвакуациялау және көлікті сақтау, оны іздеу немесе тәркілеу шығындарын, сот орындаушысының қызмет ақысын, сот және нотариалдық шығындарды өтеуі мүмкін. Келісімшарт талаптары бұзылған жағдайда айыппұл да қарастырылуы ықтимал.

Жеке тұлғаларға автолизинг беру идеясы 2024 жылы пайда болған. 2025 жылдың қаңтарында Мәжіліс тиісті заң жобасын жұмысқа қабылдады. Кейін азаматтарға көлікті кейіннен сатып алу құқығымен лизингке алу мүмкіндігі қарастырылды.

Автонесиеден айырмашылығы - лизингтегі автомобиль барлық міндеттеме орындалғанға дейін лизингтік компанияның меншігінде қалады. Келісім мерзімі аяқталған соң клиент көлікті сатып ала алады, қайтара алады немесе жаңа шарт жасай алады.

2025 жылдың желтоқсанында жеке тұлғаларға арналған автолизинг бағдарламасын іске қосу жоспарланған болатын. Алайда бағдарлама толыққанды жұмыс істеп кетпеді. 2026 жылдың шілдесінде Tengri Auto пилоттық кезеңде небәрі бір-екі келісім жасалғанын хабарлады.

Өнеркәсіп және құрылыс министрлігі механизмді, соның ішінде ақпараттық жүйелер мен дерекқорларды интеграциялау мәселелерін әлі де пысықтау қажет екенін мәлімдеді. Бағдарламаны толық іске қосу 2026 жылдың күзіне жоспарланған.