Үш жасар қызын атастырмақ болған әке ұсталды

Пәкістанда үш жасар қызын 60 жастағы ер адамға тұрмысқа бермек болды деген күдікпен оның әкесі қамауға алынды, деп хабарлайды ZontNews.kz. Daily Mail басылымына сілтеме жасап.

Оқиға Ауғанстанмен шекаралас Белуджистан провинциясының Чаман қаласында болған.

Полицияның мәліметінше, Абдул Баки есімді тұрғын үш жасар қызын Салах Уддин есімді 60 жастағы ер адамға 2,5 миллион пәкістан рупийіне, шамамен 9 мың долларға атастырмақ болған.

Келісім «уалвар» деп аталатын дәстүр бойынша жасалған. Бұл салтқа сәйкес, күйеу жігіт немесе оның отбасы қалыңдықтың туыстарына белгілі бір мөлшерде ақша төлейді.

Құқық қорғау органдары араласқан кезде келісілген қаражаттың толық берілмегені анықталды. Осыған байланысты неке рәсімі жүзеге аспаған.

Оқиға туралы ақпарат әлеуметтік желіде тарағаннан кейін жергілікті билік тергеу бастады. Қыздың әкесі ұсталды, ал 60 жастағы ер адам іздестіріліп жатыр. Бүлдіршін мен оның анасы полицияның қорғауына алынды.

Тергеу барысында бұл істің қыздың қайтыс болған 13 жастағы әпкесінің өлімімен байланысы болуы мүмкін екені анықталған. Полиция мәліметінше, жасөспірім бұған дейін Салах Уддиннің ұлына 1,5 миллион рупий көлеміндегі «уалвар» ақысына тұрмысқа берілген. Кейін оның күйеуі әйелін өлтірді деген күдікпен ұсталған.

Қазір полиция екі отбасы арасындағы жанжалдың жасөспірімнің өліміне қатысы бар-жоғын тексеріп жатыр.

Белуджистан провинциясында 2025 жылдан бері 18 жасқа толмағандарды некеге тұрғызуға тыйым салынған. Кәмелетке толмаған баламен некеге тұрған немесе оны ұйымдастыруға көмектескен адамдарға бас бостандығынан айыру және айыппұл түріндегі жаза қарастырылған.

UNICEF деректеріне негізделген мәлімет бойынша, Белуджистандағы жас әйелдердің 21,6 пайызы 18 жасқа толмай тұрмысқа шыққан. Кедей отбасылар арасында бұл көрсеткіш бұдан да жоғары.