Путин Трамп пен Си Цзиньпинге Зеленскийсіз кездесуді ұсынды – WSJ

Ресей президенті Владимир Путин АҚШ президенті Дональд Трамп пен Қытай төрағасы Си Цзиньпинге Украинадағы соғысты тоқтату мәселесін талқылау үшін үшжақты кездесу өткізуді ұсынды, деп хабарлайды  ZontNews.kz. америкалық The Wall Street Journal басылымына сілтеме жасап.

Басылымның мәліметінше, Путин бұл ұсынысын 9 қазанда Трамппен телефон арқылы сөйлесу кезінде айтқан. Кездесу 18–19 қарашада Қытайдың Шэньчжэнь қаласында өтетін Азия-Тынық мұхиты экономикалық ынтымақтастығы саммиті аясында ұйымдастырылуы мүмкін. Алайда келіссөздердің өтетін орны мен мерзімі әзірге нақты бекітілмеген.

Дональд Трамп үшжақты саммитке қатысуға әлі келісім берген жоқ. Си Цзиньпиннің де Ресей президентінің ұсынысын қолдайтыны белгісіз.

Ресей президентінің баспасөз хатшысы Дмитрий Песков The Wall Street Journal басылымына үшжақты келіссөздер өткізу мүмкіндігі талқыланып жатқанын растаған.

– Кездесудің өзі немесе оның ықтимал күн тәртібі туралы әзірге нақты түсінік жоқ. Дегенмен үш тарап та мұндай кездесуді өткізудің болжамды мүмкіндігін мойындайды, – деді Песков.

АҚШ-тың жоғары лауазымды өкілінің айтуынша, Трамп саммитке қатысуға келіспегенімен, бұл ұсынысты қарастыруы мүмкін.

WSJ мәліметінше, ұсынылған формат Украина президенті Владимир Зеленскийдің қатысуын қарастырмайды. Басылым дереккөздерінің айтуынша, Путин Вашингтонмен қарым-қатынастың жақсаруын пайдаланып, соғысты Мәскеуге тиімді шарттармен аяқтауға ұмтылуы мүмкін.

Саммит өткізу туралы ұсыныс АҚШ әкімшілігінің Ресейге қатысты жуырдағы шешімдері аясында айтылды. Путин мен Трамптың телефон арқылы сөйлесуінен кейін Вашингтон ресейлік дизель отынын сатып алу туралы келісімге келген. 16 қазанда Трамп Ресейге қарсы негізгі санкциялық шаралардың енгізілуін тоқтатты.

Зеленский бұл шешімдерді сынға алып, Мәскеуге қысымның әлсіреуі соғыстың созылуына әкелуі мүмкін екенін ескертті.