Әлемде 273 миллион бала білімсіз қалып отыр – ЮНЕСКО есебі
Бүгінде әлемде әрбір алтыншы баланың мектепке баруға мүмкіндігі жоқ. Бұл туралы ЮНЕСКО-ның білім беру саласының жай-күйіне арналған жаңа жаһандық баяндамасында айтылған. Сарапшылардың бағалауынша, 2024 жылы шамамен 273 миллион бала мен жасөспірім білім беру жүйесінен тыс қалған. Ең алаңдатарлығы – бұл көрсеткіш қатарынан жетінші жыл өсіп келеді, деп хабарлайды ZontNews.kz.
ЮНЕСКО деректеріне сәйкес, жасөспірімдердің тек үштен екісі ғана толық орта білім алып шығады. Мамандар мұның негізгі себептері ретінде халық санының артуын, экономикалық дағдарыстарды және білім беру саласына бөлінетін қаржының қысқаруын атап отыр.
Әсіресе қарулы қақтығыстар жүріп жатқан аймақтарда жағдай күрделі. Мұндай өңірлерде мектептер жиі жабылып, миллиондаған бала білім алу мүмкіндігінен айырылуда. Сонымен қатар, нақты жағдай бұдан да ауыр болуы мүмкін, себебі қақтығыс аймақтарынан алынған деректердің бір бөлігі ресми статистикаға кірмей қалады. Таяу Шығыста да ахуал алаңдатарлық: тұрақсыздық салдарынан көптеген оқу орындары жабылып, балалардың білім деңгейі төмендеу қаупі күшейіп отыр.
Соған қарамастан, баяндамада оң өзгерістер де бар. Соңғы жылдары бірқатар елде мектепке бармайтын балалар саны айтарлықтай азайған. Атап айтқанда, Мадагаскар, Того, Марокко, Вьетнам, Грузия және Түркия білім беру қолжетімділігін арттыруда елеулі нәтижеге жеткен. Кейбір елдерде мектепке дейінгі білім беру қарқынды дамып келеді. Мысалы, Әзербайжанда бірнеше жыл ішінде балабақшаға баратын балалардың үлесі 25 пайыздан 92 пайызға дейін өскен. Өзбекстанда да ұқсас үрдіс байқалады – соңғы жеті жылда мектепке дейінгі біліммен қамту шамамен үш есеге артқан.
Жалпы алғанда, 2000 жылдан бері әлемде білімге қолжетімділік айтарлықтай кеңейді. Бастауыш және орта білім алатын балалар саны шамамен 30 пайызға артты. Балабақшадағы балалар саны 45 пайызға көбейсе, орта білімнен кейінгі оқу орындарындағы студенттер саны 160 пайыздан астам өскен. Сонымен қатар, ЮНЕСКО білім беру саласындағы гендерлік алшақтықтың біртіндеп қысқарып келе жатқанын атап өтеді. Қазіргі таңда ұлдар мен қыздардың мектепке қолжетімділігі шамамен тең деңгейге жеткен.
Әлем жаңалықтары
Тағы
Сізді де қызықтырады
Сұхбат
Бөлімге өтіңіз
Trends
Бөлімге өтіңіз
Сарапшы сөзі
Бөлімге өтіңіз
Әзірге түсініктеме жоқ!
Пікір қалдыратын бірінші адам болыңыз