Испания құрамасы футболдан 2026 жылғы әлем чемпионы атанды
Футболдан 2026 жылғы әлем чемпионатының финалында Испания құрамасы Аргентинаны қосымша уақытта 1:0 есебімен жеңіп, әлем чемпионы атанды, деп хабарлайды ZontNews.kz.
Кездесу тартысты басталды. Алғашқы минуттардан-ақ испаниялық футболшылар шабуылға ден қойып, қарсылас қақпасы маңында бірнеше қауіпті сәт ұйымдастырды. Өз кезегінде Аргентина құрамасы қарымта шабуылдарға иек артты.
Негізгі уақытта екі команда да есеп аша алмады. Осылайша матч 0:0 есебімен аяқталып, жеңімпаз қосымша уақытта анықталды.
Ойынның шешуші сәті қосымша уақыттың 106-минутында тіркелді. Бұған дейін аргентиналық жартылай қорғаушы Энцо Фернандес қызыл қағаз алып, командасын бір ойыншыға кем қалдырған болатын. Сан басымдығын тиімді пайдаланған Испания құрамасы Ферран Торрестің голының арқасында алға шықты. Бұл кездесудегі жалғыз гол болып, Испанияға әлем чемпионы атағын сыйлады.
Испания турнирді сенімді өткізді. Н тобында Уругвайды (1:0) және Сауд Арабиясын (4:0) жеңіп, Кабо-Вердемен (0:0) тең түсті. Кейін плей-офф кезеңінде Аустрияны (3:0), Португалияны (1:0), Бельгияны (2:1) және жартылай финалда Францияны (2:0) жеңіп, финалға жолдама алды.
Аргентина J тобында барлық үш ойында жеңіске жетіп, Аустрияны (2:0), Алжирді (3:0) және Иорданияны (3:1) ұтты. Одан кейін Кабо-Вердені (3:2, қосымша уақыт), Египетті (3:2), Швейцарияны (3:1, қосымша уақыт) және жартылай финалда Англияны (2:1) жеңіп, финалға дейін жетті.
Осылайша Испания өз тарихында екінші рет әлем чемпионы атанды. Бұған дейін олар 2010 жылы Оңтүстік Африкада өткен әлем чемпионатында жеңімпаз болған еді. Ал Аргентина әлем чемпионатын үш мәрте жеңіп алған құрамалар қатарында қалып отыр.
Trends
Тағы
Сізді де қызықтырады
Сұхбат
Бөлімге өтіңіз
Сарапшы сөзі
Бөлімге өтіңіз
Әзірге түсініктеме жоқ!
Пікір қалдыратын бірінші адам болыңыз