Қаһар Бинахметов 
Украинада болашақ бейбіт келісімді қамтамасыз ету мақсатында онға жуық мемлекет өз әскери бөлімшелерін орналастыруға дайын. Бұл туралы ZontNews.kz Bloomberg агенттігіне сілтеме жасап хабарлады.
19 тамызда Еуропа елдерінің өкілдері Ұлыбритания мен Франция әскерін жіберу жоспарын талқылады. Кездесуде бөлімдердің саны мен олардың қай аймақтарға орналастырылатыны қаралды. Алдағы күндері Еуропа қарулы күштерінің өкілдері АҚШ-пен кеңес өткізіп, «қауіпсіздіктің сенімді кепілдіктерін» айқындамақ.
Axios мәліметінше, қауіпсіздік кепілдіктері жөніндегі жұмыс тобын АҚШ мемлекеттік хатшысы Марко Рубио басқарып отыр. Оның сөзінше, құжат осы апта соңына дейін келісіліп қалуы мүмкін. Алғашқы кезеңде еуропалық нұсқаушылар украин сарбаздарын оқытып, әскер қатарын толықтыруға атсалыспақ. Олар майданнан шалғай аудандарға орналастырылады.
Жоспарда барлау деректерін бөлісу, шекараны бақылау, қару-жарақ жеткізу және әуе қорғаныс элементтерін енгізу көзделген.
АҚШ президенті Дональд Трамп Fox News арнасына берген сұхбатында Вашингтонның еуропалық бастамаларды қолдауға дайын екенін мәлімдеді. Ол қолдаудың авиациялық құрамды да қамтитынын атап өтті.
НАТО бас хатшысы Марк Рютте 30 мемлекеттен тұратын топтың, соның ішінде Жапония мен Австралияның да бар екенін айтты. Бұл елдер бейбіт келісім жасалған жағдайда іске қосылатын қауіпсіздік кепілдіктерінің тұжырымдамасын әзірлеп жатыр. Жапония премьер-министрі Сигэру Исиба да өз елінің заң аясында осы жұмысқа қатысуға әзір екенін жеткізді.