Қаһар Бинахметов 
Шымкентте білім және денсаулық сақтау саласындағы сыбайлас жемқорлыққа қатысты атышулы іс бойынша үкім шықты. Ұлттық қауіпсіздік комитетінің бұрынғы департамент басшысының бірінші орынбасары Манат Сарбасов 12 жылға бас бостандығынан айырылды, деп хабарлайды ZontNews.kz.
Сот материалдары бойынша Сарбасов аса ірі көлемде пара алу, қылмыстық жолмен алынған мүлікті заңдастыру және қызмет бабын пайдаланып әрекетсіздік жасау баптары бойынша айыпталған.
«Сарбасов аса ірі көлемде пара алу, қылмыстық жолмен алынған мүлікті заңдастыру және қызмет бабында әрекетсіздік жасау қылмыстарын жасағаны үшін кінәлі деп танылды», — деді судья Әлинұр Қарабаев.
Сот оның жазасын орташа қауіпсіздік мекемесінде өтеуін, ҰҚК подполковнигі шенінен айырылуын, өмір бойы мемлекеттік қызметте жұмыс істеуге тыйым салынуын және заңсыз алынған мүліктерін тәркілеуді үкім етті. Пәтері мен Land Cruiser 200 автокөлігі мемлекет меншігіне өтті, 70 миллион теңге көлеміндегі пара өндірілді.
Сонымен қатар, Шымкент қаласының бұрынғы денсаулық сақтау басқармасының басшысы Темірхан Варзилов қызметтік өкілетін асыра пайдаланды деп танылды. Сот оның отбасылық жағдайын, созылмалы ауруын және кінәсін ішінара мойындауын ескеріп, 4 жылға бостандығын шектеу жазасын тағайындады.
Шымкент ҰҚК департаментінің бұрынғы қызметкері Айдос Сраилов ішінара ақталды. Ол заңсыз кәсіпкерлікке қатысты кінәлі деп танылды, бірақ 2021 жылғы амнистияны ескере отырып, негізгі жазадан босатылды. Дегенмен ҰҚК майоры шенінен айырылып, өмір бойы мемлекеттік қызметте жұмыс істеу құқығынан айырылды.
Денсаулық сақтау басқармасының бұрынғы бөлім басшысы Шыңғыс Жаңабаев мемлекеттік мүлікті аса ірі көлемде жымқырғаны үшін 7 жылға бас бостандығынан айырылып, өмір бойы мемлекеттік қызметке тыйым салынды.
Медициналық жабдық жеткізумен айналысқан кәсіпкер Ерлан Тышқанбаев бюджет қаражатын жымқыру ісінде сыбайлас ретінде кінәлі деп танылып, 7 жыл шартты жаза алды. Ол пробациялық бақылауға алынған және кәсіпкерлік қызметте басшылық лауазым атқара алмайды.
Үкім алты алқабидің бесеуінің келісімімен қабылданды. Сот процесі шамамен жарты жылға созылып, айыпталушылар 20 айдан астам уақыт қамауда болды. Істе ондаған куәгер және жүздеген дәлелдеме қаралды.