Қаһар Бинахметов 
Қазақстан үкіметі ең төмен баға деңгейі белгіленетін тауарлар тізімін кеңейтті, деп хабарлайды ZontNews.kz.
Қаулы 16 қазанда қабылданып, 31 қазаннан бастап күшіне енеді. Ол 2025 жылдың 31 желтоқсанына дейін қолданыста болады.
Бұған дейін тізімде 11 тауар болса, енді олардың саны 36-ға жетті. Жаңартылған тізімге азық-түлікпен бірге бірқатар өнеркәсіптік және ауыл шаруашылық өнімдері енгізілді.
Тізімде спирт, арақ, коньяк, спирттік тұнбалар, жұмыртқа, бидай мен бидай ұны, күнбағыс майы, ашытқы, ірімшік пен сүзбе бар. Сондай-ақ картоп, қырыққабат, сәбіз, алма, банан, апельсин, мандарин, ет өнімдері мен шұжықтар (оның ішінде жәндіктерден жасалған өнімдер) қамтылған.
Сонымен қатар тізімге минералды тыңайтқыштар, антифриздер, еріткіштер мен отқа төзімді кірпіштер енгізілді.
«Бұл шара әлеуметтік маңызы бар және импортқа тәуелді тауарлар бағасын бақылау, сондай-ақ инфляциялық қысым кезінде негізсіз қымбаттаудың алдын алу үшін қабылданды», – деп мәлімдеді үкімет.