Қаһар Бинахметов 
Мемлекеттік «Қазақфильм» киностудиясы 1,37 млрд теңгеге 47 анимациялық фильм түсірген. Бірақ олардың бірде-бірі прокатқа шықпады. Олардың көбі YouTube-тағы Qazaq Animation арнасында жарияланғанымен, орта есеппен мың қаралым да жиналмады, деп хабарлайды ZontNews.kz Tengrinews-ке сілтеме жасап.
Жоғары аудиторлық палата дерегінше, 2019 бен 2024 жыл аралығында анимацияға жүздеген миллион теңге бөлінгенімен, ірі онлайн-платформалармен серіктестік орнамады.
Мәдениет министрлігі түсіндірді: мультфильмдер қысқаметражды, олар прокатқа емес, ағартушылық пен фестивальдерге арналған.
Сонымен бірге министрлік шығындарды бақылау жүйесінің әлсіз екенін мойындады. Қаржының ашықтығын қамтамасыз ету үшін енгізілуі тиіс «Е-кино» жүйесі әлі іске қосылған жоқ.
Осылайша, салық төлеушілердің ақшасына түсірілген мультфильмдер көрерменсіз қалды.