Қаһар Бинахметов 
2025 жылдың шілдесінде Қазақстан электр энергиясын импорттауды айтарлықтай көбейтті. Бірінші кредиттік бюро деректеріне сәйкес өсім бір айда 98 пайыз болды, деп хабарлайды ZontNews.kz.
Қаңтар-шілде аралығында ел сырттан 169,2 миллион доллардың электр энергиясын сатып алып, соңғы 11 жылдағы ең жоғары деңгейге жетті.
Шілде айында импорт көлемі 56,8 миллион долларды құрады. Бұл өткен жылдың дәл осы кезеңімен салыстырғанда 74 пайызға көп. Киловатт-сағатпен есептегенде өсім бұдан да жоғары – маусым айымен салыстырғанда екі есеге артқан. Жалпы, жеті айда Қазақстан 2,3 миллиард киловатт-сағат электр энергиясын импорттады.
Негізгі жеткізуші – Ресей. Оның үлесіне импорт көлемінің 86 пайызы, ал ақшалай есеп бойынша 96 пайызы тиесілі. Қазақстандық энергетикалық жүйе ресейлік электр қуатын негізінен таңертеңгі және кешкі сұраныс шарықтаған кезде алады, өйткені ішкі қуат көздері ол уақытта жүктемені толық көтере алмайды.
Сарапшылардың айтуынша, елде электр энергиясына сұраныс өндірістен жылдам өсіп келеді: шілдеде ішкі нарықтағы сату 8 пайызға артып, 10,1 миллиард кВт·сағатқа жетті. Ал өндіріс небәрі 3 пайызға өсіп, 9,4 миллиард кВт·сағат болды.
Бұған дейін Ресейден жыл соңына дейін сатып алынатын электр энергиясы екі миллиард киловатт-сағаттан аспайды деп болжанған еді. Алайда бұл көлем жеті айдың ішінде-ақ пайдаланылды.