Қаһар Бинахметов 
Қазақстан экономикасы өсіп жатыр, бірақ қарқыны баяулады. 2025 жылдың тоғыз айының қорытындысы бойынша жалпы ішкі өнімнің өсімі 6,3 пайызға жетті, деп хабарлайды ZontNews.kz.
«Қаңтар мен тамыз аралығындағы көрсеткіштермен салыстырғанда өсімнің аздап бәсеңдегені байқалады. Нақты секторда өсім 8,1 пайыз, қызмет көрсету саласында — 5,3 пайыз. Ең жоғары өсім көлік, құрылыс және тау-кен өнеркәсібі салаларында байқалды», — деді Үкімет отырысында ұлттық экономика бірінші вице-министрі Асқар Әмрин.
Оның айтуынша, экономикалық өсімнің негізгі қозғаушы күштері — өнеркәсіп, сауда және көлік. Бұл салалар жалпы экономикалық өсімнің 70 пайыздан астамын құрады.
«Сауда 8,8 пайызға, өңдеу өнеркәсібі 6,2 пайызға, ауыл шаруашылығы 4,4 пайызға артты. Алайда кейбір өңірлердегі өндірістің қысқаруы жалпы көрсеткішке әсер етті», — деді Әмрин.
Негізгі капиталға салынған инвестициялар 13,5 пайызға өсіп, 13,8 трлн теңгеге жетті. Оның ішінде жеке инвестициялар 7,8 пайызға артқан.
«Ең жоғары инвестициялық өсім Ақмола, Жамбыл, Ақтөбе, Павлодар облыстары мен Астанада тіркелді. Атырау облысында керісінше төмендеу байқалды», — деді вице-министр.
Оның мәліметінше, сыртқы сауда балансы оң көрсеткіште қалып отыр. Қаңтар–тамыз айларында тауар айналымы 90,1 млрд долларды құрады.
«Экспорт 50,2 млрд долларға жетті, оның ішінде өңделген тауар экспорты — 18,1 млрд доллар. Импорт 40,1 млрд доллар болды. Әлемдік нарықтағы баға төмендегенімен, сыртқы сауда балансы оң күйінде қалып, 10 млрд доллардан асты», — деді Әмрин.
Құрылыс саласында да өсім бар, бірақ қарқыны бәсеңдеді.
«Құрылыс көлемі 14,9 пайызға артқанымен, өсім қарқыны 3,2 пайыздық тармаққа баяулады. 12,9 млн шаршы метр тұрғын үй пайдалануға берілді. Ең жоғары көрсеткіш Ұлытау, Жетісу, Алматы және Түркістан облыстарында тіркелді», — деді ол.
Ауыл шаруашылығында жағдай тұрақты.
«Жалпы өнім көлемі 4,4 пайызға өсті. Бұл астық жинау қарқынының жоғары болуымен байланысты. Ең жоғары өсім Солтүстік Қазақстан, Қостанай және Ақмола облыстарында байқалды», — деп қорытындылады Әмрин.