Қаһар Бинахметов 
Шалқар ауданы әкімінің өкімімен Аян Қорқытұлы аудан әкімінің орынбасары қызметіне келді, деп жазады ZontNews.kz.
2015 жылы ол Шалқар қаласы тұрғын үй-коммуналдық шаруашылық бөлімін басқарып жүргенде әлеуметтік желіде айтқан сөзімен көпшілікке танылған.
Сол жылы жергілікті телеарнаға берген сұхбатында қала жолдарының жағдайы туралы сұраққа:
«Бұл жылы мүлде ақша жоқ. Әйтеке би көшесін жөндеуге бөлінген қаржыны қайтарып алды. Қысқасы, ақша жоқ. Дәл осылай жаз, басыңды ауыртпа» – деп жауап берген.
Сұхбат соңында айтқан «Шалқар чики-чики» деген сөзі интернетте кең тарап, оны елге танытты.
Осыдан кейін тәртіптік кеңес «мемлекеттік қызметкердің ар-намыс кодексін бұзды» деп айыптап, қызметіне толық сәйкес емес деген қорытынды шығарды. Кеңес мүшелері «қызметкер көпшілік алдында мәдениетті сөйлеуі тиіс» деп атап өтті.
Кейін Қорқытұлы камераның қосылып тұрғанын білмегенін мәлімдеді.