Қаһар Бинахметов 
Қасым-Жомарт Тоқаев Нью-Йоркке жасаған сапары барысында Қазақстанмен жұмыс істейтін ірі компаниялардың жетекшілерімен кездесті, деп хабарлайды ZontNews.kz.
Алғашқы кездесу «Cameco» корпорациясының президенті Тим Гитцельмен өтті. Тараптар уран саласын дамыту перспективаларын талқылады. Тоқаев компанияның Қазақстанға 500 миллион доллардан астам инвестиция құйғанын және «Қазатомпромның» сенімді серіктесі екенін айтты.
Президент еліміздің энергетикада жаңа кезеңге қадам басқанын, үш атом электр станциясын салуды жоспарлап отырғанын атап, «Cameco»-ның инновациялық технологияларына қызығушылық танытты.
Одан кейін мемлекет басшысы «Goldman Sachs Global Institute» президенті Джаред Коэнмен кездесті. Кездесу барысында қаржы секторын цифрландыру және жасанды интеллектіні енгізу жобалары талқыланды. Тоқаев Қазақстанның цифрлық мемлекет болуға ұмтылатынын және жетекші америкалық банктің бастамаларына ашық екенін айтты.
Сондай-ақ Тоқаев «Educational Testing Service» (ETS) президенті әрі бас директоры Амит Севакпен жүздесті. Мемлекет басшысы білім беру тестілеуіндегі ETS тәжірибесінің маңызын атап өтіп, Қазақстанның білім жүйесін реформалауда үздік тәжірибелерді қолдануға дайын екенін жеткізді. ETS жыл сайын 180 елде 50 миллионнан астам тест әзірлейді және халықаралық қатысуын кеңейтуді көздейді.