Қаһар Бинахметов 
Қазақстан президенті Қасым-Жомарт Тоқаевтың жарлығымен Мұрат Нұртілеу халықаралық инвестициялық және сауда ынтымақтастығы жөніндегі президенттің көмекшісі болып тағайындалды. Ол осыған дейін атқарған премьер-министрдің орынбасары әрі сыртқы істер министрі қызметінен босатылды, деп хабарлайды ZontNews.kz.
Еске салсақ, сыртқы істер министрлігі мен Жалған ақпаратқа қарсы іс-қимыл орталығы 4 қыркүйекте кейбір ақпарат құралдарында тараған Мұрат Нұртілеу мен бизнесмен Гаджи Гаджиевті қамауға алу туралы хабарламаны жоққа шығарды. СІМ ресми өкілі Айбек Смадияров «Сыртқы істер министрін ұстады» деген ақпараттың шындыққа жанаспайтынын айтып, оны «журналистік этика мен қолданыстағы заңнаманы бұзу» деп атады.
Орталық «жалған ақпаратты таратуға немесе оған көмектесуге қылмыстық жауапкершілік көзделгенін» еске салды. ҰҚК де «бірқатар жоғары лауазымды қызметкерлердің ұсталғаны туралы ақпараттың шындыққа сәйкес еместігін» мәлімдеді.
Мұрат Нұртілеу 8 қыркүйекте Үкімет үйінде болып, өзінің «қамалғаны» туралы хабарды «жалған әрі абсурд» деп атады.
Сондай-ақ Ақорда хабарлағандай, Ермек Қошербаев Қазақстанның сыртқы істер министрі болып тағайындалды. Ол бұрынғы қызметінен босатылды.