By Қаһар Бинахметов 
Ресей Қара теңіз порттарында шетелдік мұнай танкерлеріне уақытша шектеу енгізді. Бұл шешім Каспий құбыр консорциумы (КҚК) арқылы тасымалданатын Қазақстан мұнайының экспортын да бөгеді, деп жазады ZontNews.kz.
Аталған консорциум акцияларының бір бөлігі америкалық Chevron мен ExxonMobil компанияларына тиесілі.
Reuters агенттігінің мәліметінше, Ресей порттарына шетелдік кемелердің кіруі үшін Федералдық қауіпсіздік қызметінің (ФСБ) келісімі қажет болатын жаңа ереже күшіне енді. Бұл құжатқа Ресей президенті Владимир Путин 15 шілдеде қол қойған.
CPC мұнайды Қазақстаннан Ресейдің Оңтүстік Озеровка порт терминалы арқылы экспорттайды. Бұл бағыт елдің мұнай экспортының 80 пайызынан астамын қамтиды.
Reuters дерегінше, Новороссийск портына қатысты шектеулер жаһандық мұнай жеткізілімінің 2 пайызынан астамына әсер етуі мүмкін.
Тек Қазақстан мұнайы емес, Ресейдің мұнай экспорты да тежеліп отыр. Шілде айында КҚК арқылы Қара теңізге 1,66 миллион баррель мұнай жөнелту жоспарланған болатын.
Ресейдің көлік министрлігі де, КҚК де бұл жағдайға байланысты түсініктеме беруден бас тартты. Алайда салалық дереккөздердің бірі порттағы мәселенің бір-екі күнде шешілуі мүмкін екенін айтты.