Қаһар Бинахметов 
Владимир Путин мен Дональд Трамптың Аляскада кездесу ықтималдығы саясаттанушылар арасында қызу талқылануда. Сарапшы Ералы Нұржұма бұл таңдау жай географиялық себеп емес, көпқабатты саяси белгі деп санайды, деп жазады ZontNews.kz.
«Путин мен Трамп Аляскада — анекдоттың бастауындай естіледі», — дейді ол.
Нұржұманың айтуынша, Аляска — тарихи әрі стратегиялық мәнге ие аумақ. XIX ғасырда Ресей империясына тиесілі болып, 1867 жылы АҚШ-қа сатылған бұл жер екі елдің ғасырлық қарым-қатынасын еске салады. Сонымен қатар Ресейге ең жақын америкалық аймақтардың бірі ретінде Арктикадағы бәсекелестіктің де нышаны саналады.
Сарапшының болжамынша, басты тақырып — Украинадағы соғыс. Тараптар бітім шарттары мен бейбіт реттеу мүмкіндіктерін талқылауы ықтимал. Ресей Украинаға бейтарап мәртебе беру мен оккупацияланған аумақтарды өз бақылауында қалдыруды көздейді, ал АҚШ Киевтің толыққанды қатысуын және егемендігін сақтауды талап етуі мүмкін.
Кездесуде «әуе бітімі» мәселесі де көтерілуі ықтимал — бұл екі тараптың бір-бірінің аумағына әуе шабуылдарын тоқтату туралы келісімі. Алайда Нұржұма мұндай келісімнің орындалуы екіталай екенін айтады, өйткені Ресей дрон өндірісіне қомақты қаржы құйған.
Сарапшының пікірінше, Путиннің мақсаты — кездесудің өзін саяси құралға айналдыру.
«Путин кез келген уәде беріп, кездесуге қол жеткізеді, кейін Трампты саяси жағдайға тәуелді етіп қоюы мүмкін», — дейді ол.
Алясканың таңдалуы Арктикадағы экономикалық жобалар, навигация және әскери қатысу тақырыптарын да талқылауға жол ашуы ықтимал.
Кездесу нақты келісімсіз аяқталса да, жаңа форматтағы тікелей диалог дәстүрін қалыптастыруы мүмкін. Бұл үрдіс «ірі державалар арасындағы келісімдер» дәуірін күшейтіп, кіші мемлекеттердің пікірін елемеуге алып келуі ықтимал.
Нұржұма Қазақстан үшін де ықтимал салдарын атады. Қарсыласу бәсеңдесе, ел екі тараппен де санкция қауіпінсіз ынтымақтастықты кеңейте алады. Алайда Ресейдің өңірдегі ықпалы артуы мүмкін, бұл Астанадан сыртқы саясатта тепе-теңдікті мұқият сақтауды талап етеді.