Қаһар Бинахметов 
Мәжіліс депутаттары Бас прокуратурадан, ішкі істер министрлігінен және Ұлттық банктен онлайн алаяқтықтан зардап шеккен азаматтарды қорғауға бағытталған шұғыл шара қабылдауды сұрады, деп хабарлайды ZontNews.kz.
Мәлімдемеге Қарағандының 232 тұрғынының ұжымдық өтініші негіз болған. Депутаттардың айтуынша, соңғы бес жылда онлайн алаяқтық істері бойынша бірде-бір сот шешімі жәбірленушілердің пайдасына шықпаған, ал тергеулер созбалаңға салынған.
Халық қалаулылары кибералаяқтық елдің қаржылық қауіпсіздігіне елеулі қатер төндіріп отырғанын атап өтті. Ең көп зардап шегетіндер – зейнеткерлер, мүгедектер мен көпбалалы отбасылар. «Киберпол» жобасы іске қосылғанына қарамастан, алданған азаматтар саны азаймай отыр.
Депутаттар екінші деңгейлі банктердің әрекетін де сынға алды. Олардың кейбірі тергеу органдарымен ынтымақтаспай, «банктік құпияны» сылтау етеді. Кей жағдайларда клиенттің жазбаша келісімінсіз биометриялық деректер жиналып, тіпті олардың атына жалған несиелер рәсімделген.
Мысалы, Қарағанды тұрғыны, 66 жастағы зейнеткер Г.И. Тутучкина психоневрологиялық есепте тұрса да, екі банк алдында 5 миллион теңгеден астам берешек болып шыққан. Ал көпбалалы Отыншин мен Аскаровтар отбасына 18,6 миллион теңгелік, ІІ топ мүгедегі А.В. Григоращенконың атына 832 мың теңгелік жалған несие рәсімделген.
Депутаттар Қаржы нарығын реттеу және дамыту агенттігінің тексерулері көбіне формалды түрде өтіп, банктер берген мәліметтерге ғана сүйенетінін атап өтті.
Парламент мүшелері Бас прокуратура мен Ұлттық банктен банк секторының ашықтығын арттырып, құқық қорғау органдарымен өзара іс-қимылды күшейтуді талап етті.
«Бұл мәселе тек зейнеткерлерге ғана емес, 17 жастан асқан жастарға да әсер етеді. Мемлекет азаматтарға онлайн қылмыстардан нақты қорғаныс қамтамасыз етуі тиіс», — деп жазылған депутаттардың үндеуінде.