Қаһар Бинахметов 
Әлемдегі ең ірі бидай импорттаушы елдердің бірі — Мысыр Қазақстаннан қайтадан астық сатып алды. Бұл туралы ZontNews.kz ZAWYA басылымына сілтеме жасап хабарлады.
Мемлекеттік сатып алу агенттігі Future of Egypt (Mostakbal Misr) алғаш рет қазақстандық бидайды импорттаған. Порт қызметтерінің мәліметінше, қыркүйектің ортасында Мысыр аумағына екі кеме келген: бірінде шамамен 11 мың тонна, екіншісінде 21 мың тонна астық болған.
Мысырдың Қазақстанға деген қызығушылығы соңғы айларда артқан. Ел билігі жеткізу көздерін әртараптандыруға мүдделі. Осы мақсатта Future of Egypt компаниясының өкілдері қазан айының басында Қазақстанға келіп, ынтымақтастықты кеңейту жолдарын талқылады.
Мысыр соңғы рет Қазақстаннан бидайды 2010 жылы сатып алған. Теңізге тікелей шығу мүмкіндігі болмағандықтан, Қазақстан экспорт кезінде негізінен Ресейдің Қара теңіз порттарын пайдаланады. Алайда қазіргі жаһандық логистикалық қиындықтар мен бағаның өсуі жағдайында қазақстандық астық стратегиялық балама ретінде қарастырылып отыр.
Сарапшылардың айтуынша, 2025–2026 маусымында Мысыр бидай импортының жалпы көлемі шамамен 13 млн тонна деңгейінде сақталады. Негізгі жеткізуші Ресей болып қала береді.
Қазақстан үшін бұл келісім тек экспорт нарығын кеңейту мүмкіндігі ғана емес, сонымен бірге әлемдік астық нарығындағы жаңа бағыттың бастамасы болуы ықтимал.