Қаһар Бинахметов 
Белгілі саясаттанушы Аркадий Дубнов Қазақстан президентінің Украина тәуелсіздігінің 33 жылдығына арналған құттықтауын ерекше қадам деп бағалады, деп жазады ZontNews.kz.
Оның айтуынша, ТМД елдері басшыларының көбі мұндайға бармаған.
«1991 жылдың 24 тамызында ГКЧП бүлігінің сәтсіз аяқталуынан кейін үш күн өткен соң Киевте Украин КСР Жоғарғы Кеңесінің кезектен тыс сессиясы өтті. Сол жиында елдің мемлекеттік тәуелсіздігі туралы акт қабылданды. Құжаттағы негізгі тіркес мынадай болды: „Мемлекеттік төңкеріс нәтижесінде Украинаға төнген өлім қатеріне байланысты“», – деді Дубнов өзінің Telegram-арнасында.
Саясаттанушы 2016 жылы Украинаның алғашқы президенті Леонид Кравчукпен өткізген сұхбатынан үзінді келтірді. Оның айтуынша, дәл осы тұжырымды Левко Лукьяненко ұсынған. Ол кеңес соты тарапынан ату жазасына кесіліп, кейін 15 жылға лагерьге жіберілген диссидент болған.
«1991 жылғы референдумда украиндердің 90 пайызы тәуелсіздікті қолдады. Бұл бір аптадан кейін Беловеж келісімдерінің қабылдануына және КСРО-ның тарауына әкелді», – деді сарапшы.
Дубновтың айтуынша, ТМД елдері Украинаға әртүрлі форматта құттықтау жолдаған. Беларусь президенті Александр Лукашенко сияқты кейбірі құттықтауды тек халыққа арнаған.
«Тек екі көшбасшы – Армения премьер-министрі Никол Пашинян мен Қазақстан президенті Қасым-Жомарт Тоқаев – Украина президенті Владимир Зеленскийді жеке құттықтауға батыл қадам жасады», – деді саясаттанушы.
Сарапшы дипломатиялық жағдайға да назар аударды: Тоқаев құттықтауын жолдардан бір күн бұрын Франция президенті Эммануэль Макронмен сөйлескен. Бірақ бұл диалогтың мазмұны ресми хабарламада көрсетілмеді.
«Президент Тоқаев соғысушы тараптардың ешқайсысына жақын еместігін тағы бір мәрте дәлелдеп, украин әріптесіне жеке құттықтау жолдады. Мен де оған қосыламын», – деді Дубнов.
24 тамыз күні Қасым-Жомарт Тоқаев Владимир Зеленскийге Украина тәуелсіздігі күнімен құттықтау телеграммасын жолдады.