Қаһар Бинахметов 
Германияның Фюрт қаласында Қазақстанның сұрауы бойынша бұрынғы прокурор Максат Дүйсенов тұтқындалды, деп хабарлайды ZontNews.kz.
Ішкі істер министрлігі де бұл деректі растады.
«Интерполдың сұрауы бойынша Фюрт қаласында халықаралық іздеуде жүрген азамат Д. ұсталды. Оны Германияның құқық қорғау органдары Интерпол желісі арқылы халықаралық ынтымақтастық аясында қамауға алды. Қылмыстық жауапкершіліктен жалтармауға жол бермеу үшін ІІМ шетелдік әріптестерімен және халықаралық ұйымдармен белсенді жұмыс жүргізіп жатыр», – деп мәлімдеді министрлік.
Дүйсенов кім?
Ол көп жыл бойы қаржы полициясы мен сыбайлас жемқорлыққа қарсы құрылымдарда қызмет еткен. Дүйсеновті Қайрат Қожамжаровтың командасының мүшесі деп есептеген. Қожамжаров қаржы полициясын басқарған кезеңде Дүйсенов маңызды қызметтер атқарып, бірқатар атышулы істерге жетекшілік етті.
2011 жылы ол «Хоргос ісі» бойынша тұтқындаулар жөнінде жария пікір білдірді. Кейін Қожамжаров Бас прокурор болғанда, Дүйсенов прокуратура жүйесіне ауысып, Сыбайлас жемқорлыққа қарсы ұлттық бюро басшысының орынбасарынан еліміздің бас көлік прокурорына дейін көтерілді. 2019 жылдың көктемінде Қожамжаров Сенатқа кеткен соң, ол қызметінен босатылды.
Азаптау ісі және Қожамжаровтың серіктері
Биыл жазда бұрынғы қаржы полициясы басшысының серіктестеріне қатысты азаптау ісі бойынша тергеу басталғаны белгілі болды. Бұл істе Талғат Татубаев, Олеся Кексель және Бауыржан Мужиковтың есімдері аталады.
Жуырда Бас прокуратура Қайрат Қожамжаровтың үстінен сотқа дейінгі тергеу басталғанын ресми растады. Оған қызмет өкілетін асыра пайдалану және заңсыз табысты заңдастыру баптары бойынша айып тағылып отыр.