Қаһар Бинахметов 
Ауыл шаруашылығы министрлігі жаңа піскен тауық жұмыртқасын елге әкелуге бір ай мерзімге тыйым салуды ұсынды. Тиісті бұйрық жобасы Ашық НҚА порталында қоғамдық талқылауға ұсынылды, деп хабарлайды ZontNews.kz.
Тыйым барлық елдерге, соның ішінде Еуразиялық экономикалық одаққа мүше мемлекеттерге де қолданылады. Транзиттік жеткізілімдерге бұл шектеу таралмайды.
Министрліктің мәліметінше, «шараның мақсаты – отандық құс шаруашылығын қолдау және ішкі нарықты қорғау». Ведомство «мұндай шешім 2025 жылдың 8 қазанында Сыртқы сауда саясаты жөніндегі ведомствоаралық комиссия отырысында қабылданды» деп хабарлады.
Сонымен қатар, Қазақстаннан тірі қой мен ешкі экспорттауға алты ай мерзімге шектеу қою ұсынылуда. Экспорттық квота 120 мың басқа дейін шектелмек. Министрлік бұл бастама ішкі нарықты тұрақтандыруға және отандық ет өңдеу кәсіпорындарын толық жүктеуге бағытталғанын айтты.
Қоғамдық талқылау 21 қазанға дейін жалғасады.