Қаһар Бинахметов 
Ерболат Жанабылов пен Эльмира Толегеноваға қарсы қылмыстық іс қозғалды, деп хабарлайды ZontNews.kz.
Бұған дейін олар заңсыз лотерея ұйымдастырғаны үшін әкімшілік жауапқа тартылған болатын. Алайда іс тоқтатылып, жаңа бап бойынша тергеу басталды. Енді Жанабыловтарға «заңсыз кәсіпкерлікпен айналысты» деген айып тағылып отыр.
«Қылмыстық кодекстің 214-бабының 1-бөлігі бойынша іс қозғалды. Тергеу басталды, күдіктілер ел аумағында. Сот шешімінен кейін әкімшілік іс материалдары бізге берілді. Сот істен қылмыстық белгілерді анықтады» — деді агенттік төрағасының орынбасары Женіс Елемесов.
Тергеу екі ай ішінде аяқталуы мүмкін.
Елемесовтің айтуынша, бастапқыда Жанабыловтар істі әкімшілік тәртіпте шешуге мүмкіндік алған.
«Егер азамат жазамен келіспесе және өтініш білдірсе, іс сотта қаралады. Жанабыловтар осындай өтініш беріп, материалдар сотқа өтті. Сол процесте қылмыстық белгілер анықталған болуы ықтимал» — деді ол.
Тергеу мәліметінше, блогерлер Instagram парақшаларында миллиондаған жазылушы арасында ұтыс ұйымдастырып, Hyundai көліктерін, жүзге жуық ақшалай сыйлық пен бірнеше смартфон үлестірген.
Қазір Жанабыловтар Қылмыстық кодекстің 214-бабының 1-бөлігі бойынша тергеліп жатыр. Бұл бап екі жылға дейін бас бостандығынан айыру, сондай-ақ мүлкін тәркілеу жазасын көздейді.