Қаһар Бинахметов 
Bank RBK-дан 144 млрд теңге жымқырғаны үшін бұрын сотталған экс-банкир Жомарт Ертаев амнистиямен босатылған еді. Алайда сот шешімінің күші жойылды, деп хабарлайды ZontNews.kz.
Мәжіліс депутаты Абзал Құспан амнистияға қарсы шағым түсірді. Прокуратура бұл бастаманы қолдады, ал сот өтінішті қанағаттандырды. Соның нәтижесінде Ертаев қайта қамауға алынады.
«Ертаевқа қатысты сот шешімі жойылды. Бас прокуратураға, Алматы облыстық сотына және бұл мәселені алғаш көтерген журналистерге алғыс айтамын», – деді депутат әлеуметтік желідегі жазбасында.
Алматы облыстық соты да түсініктеме берді.
«Апелляциялық алқа бірқатар заң бұзушылықты анықтады. Ертаевқа екі үкім (2020 және 2021 жылдары) шығарылған, бірақ жазаны есептегенде алғашқы үкім ескерілмеген. Үкімде мерзімнің қай күннен бастап есептелетіні көрсетілмеген. Құжаттар арасында қарама-қайшылық бар. Сонымен қатар сот сілтеме жасаған анықтама мекеме басшысының қолынсыз ұсынылған».
Осылайша Ертаевқа амнистия қолданылмайтын болды.
Еске сала кетейік, ол 2011–2017 жылдары Bank RBK-дан 144 млрд теңге ұрлады деп танылған. 2020 жылы сот оны 11 жылға бас бостандығынан айырды, кейін апелляция жазаны 9 жылға қысқартты.
2025 жылдың күзінде Ертаев амнистия арқылы бостандыққа шыққан еді. Бұл шешім қоғамда үлкен наразылық тудырды. 53 жастағы банкирдің ісі 46 эпизодтан, 700 томнан және 3600-ден астам беттен тұрды. Сол процесте Qazaq Banki-нің бұрынғы акционері Бахыт Ибрагим де айыпталды. Ол бостандыққа шыққаннан кейін өз-өзіне қол жұмсаған.