Қаһар Бинахметов 
Қырғызстан президенті Садыр Жапаров ауыр қылмыстарға, соның ішінде балалар мен әйелдерге жасалған зорлық-зомбылыққа қатысты өлім жазасын енгізу жөнінде заңнамалық түзетулер әзірлеуді тапсырды, деп хабарлайды ZontNews.kz.
Бұл шешім 16 жастағы Айсулууға жасалған қылмысқа байланысты қабылданды. Оқиға елде кең қоғамдық резонанс тудырды.
Президенттің баспасөз хатшысы Аскат Алагозовтың айтуынша, Жапаров тергеудің барысын жеке бақылап отыр. Ол трагедия туралы хабарды терең өкінішпен қабылдағанын айтып, «мұндай қылмыстар жазасыз қалмауы тиіс» деді.
Жапаровтың тапсырмасымен ел билігі қазір Қылмыстық кодекске түзетулер енгізуге дайындық жүргізіп жатыр. Өзгерістер балаларға зорлық жасау және әйелдерді өлтіріп зорлау үшін өлім жазасын қарастырады.
27 қыркүйекте Қараколда 2008 жылы туған қыз жоғалған. Оның денесі Жел-Арық ауылының маңынан табылды. Қыз зорланғаннан кейін тұншықтырып өлтірілген. Күдікті – 1984 жылы туған, бұрын сотталған ер адам. Ол Бішкекте ұсталды.