Қаһар Бинахметов 
Президенттің баспасөз хатшысы Руслан Желдібай соңғы кадрлық ауысулар мемлекеттік қызметтің тиімділігін арттыру мақсатында жасалғанын хабарлады, деп жазады ZontNews.kz
«Кейінгі кадрлық өзгерістерге байланысты БАҚ өкілдерінен көптеген сауал келіп жатыр. Ең алдымен, мына мәселені баса айту керек, бұл – әдеттегі кадрлық ротация. Негізгі мақсат – мемлекеттік жүйедегі ең маңызды бағыттардың тиімділігін күшейту», – деді Руслан Желдібай.
Ол атап өткендей, мемлекет басшысы жақындағы жолдауында ұлттық экономикаға қосымша инвестиция тартуды басты приоритет ретінде белгіледі. Бұл маңызды бағытқа жауапты қызметке тәжірибелі дипломат Мұрат Нұртілеу тағайындалды. Президенттің көмекшісі ретінде ол шетелдік мемлекеттердің жоғары деңгейдегі өкілдерімен және ірі халықаралық компаниялардың басшыларымен байланыс орнатуды, халықаралық инвестициялық және сауда ынтымақтастығын жеделдетуді қамтамасыз етеді.
Сонымен қатар, Жаслан Мадиев премьер-министрдің орынбасары – жасанды интеллект және цифрлық даму министрі қызметіне тағайындалды. Жаңа министрге жолдауда көрсетілген мақсат – Қазақстанды цифрлық мемлекетке айналдыру – жүзеге асыру міндеті жүктелді. Президент оған алдағы стратегиялық мәні бар жауапты жұмысқа қатысты нұсқау берді.
Сондай-ақ, премьер-министрдің келісімімен Жұлдыз Сүлейменова мәжіліс депутаты ретінде білім министрі қызметіне тағайындалды. Ол қоғамдық жұмыстардағы белсенділігімен және білім саласындағы бай тәжірибесімен танымал.
Еске салсақ, президент Тоқаев жолдауында ұлттық экономикаға қосымша инвестиция тартуды негізгі міндет ретінде атап өткен еді.