Қаһар Бинахметов 
Астанада апелляциялық сот Перизат Қайрат пен оның анасы Гайни Алашбаеваның ісін қарайды, деп хабарлайды ZontNews.kz.
Соттың баспасөз қызметінің хабарлауынша, сәрсенбі күні қала сотының апелляциялық алқасы Перизат Қайрат, Ғайни Алашбаева және олардың адвокаты Асланбек Даулетяровтың шағымдарын қарастырады.
25 шілдеде Астананың қылмыстық істер жөніндегі ауданаралық соты Перизат Қайратты алаяқтық пен ақшаны заңсыз айналымға шығару айыптары бойынша кінәлі деп танып, 10 жылға бас бостандығынан айырды. Оған сондай-ақ 10 жыл бойы қайырымдылық қызметімен айналысуға тыйым салынып, мемлекеттік наградасы мен мүлкі тәркіленді.
Перизат Қайраттың анасы Ғайни Алашбаева да осы баптар бойынша кінәлі деп танылып, 7 жылға сотталды. Оған да 10 жылға қайырымдылықпен айналысуға тыйым салынды, мүлкі тәркіленді.
Айыптау материалдарына сәйкес, Перизат Қайрат пен Гайни Алашбаева азаматтардың сенімін теріс пайдаланып, 3 млрд 545 млн 897 мың 507 теңгені иемденген.
Сот шешімімен тәркіленген мүлік зардап шеккендердің шығынын өтеуге бағытталды. Жәбірленушілер қатарында Forte Bank, Alatau City Bank (бұрынғы Jusan) және Kaspi финтех-компаниясы бар.