Қаһар Бинахметов 
Президент Қасым-Жомарт Тоқаев «Байқоңыр» ғарыш айлағында «Бәйтерек» зымыран кешенін құру туралы Қазақстан мен Ресей үкіметтері арасындағы келісімге түзетулер енгізетін хаттаманы ратификациялау туралы заңға қол қойды, деп хабарлайды ZontNews.kz.
Құжатқа сәйкес, зымыран тасығыштың ұшу сынақтары 2023 жылдан 2025 жылға ауыстырылды. Сондай-ақ жобаның негізгі шарттары нақтыланды. Маңызды өзгерістердің бірі – 2028–2039 жылдар аралығында Ресей тарапынан жылына екі емес, үш рет ұшыру жоспарлануы. Бұл кешеннің жұмыс көлемін ұлғайтып, экономикалық тиімділігін арттыруға тиіс.
Хаттамада салықтық жеңілдіктер де көзделген. Атап айтқанда, бейрезиденттер үшін қосылған құн салығы нөлдік мөлшерлемемен қолданылмақ, ал «Бәйтерек» акционерлік қоғамы үшін корпоративтік табыс салығы бойынша жеңілдіктер ұзартылды. Бұл бюджеттен қосымша қаражат бөлуді қажет етпейді.
2025 жылы Қазақстан жобаның жалпы құны 90,8 млрд теңгенің 60,8 млрд теңгесін қаржыландыруды жоспарлап отыр. Ресей тарапы «Союз-5» зымыран тасығышын және оған қажетті жабдықтарды әзірлеуде. «Бәйтерек» кешенінен алғашқы ұшыру 2025 жылдың желтоқсанына белгіленді.
Құжаттың түсіндірме бөлімінде заңның Қазақстанның ғарыш саласы үшін стратегиялық маңызы бар екені, ол аппараттарды дайындаудан бастап ұшыруға дейін толық циклді қалыптастыруға мүмкіндік беретіні атап өтілген.