Астанада 126 мыңнан астам оқушы орыс тілінде білім алуды таңдаған

Астанада 2025–2026 оқу жылында 310 848 бала білім алып жатыр. Олардың 176 457-і қазақ тілінде, ал 126 195-і орыс тілінде оқиды, деп хабарлайды ZontNews.kz.

Қала білім басқармасының дерегіне сәйкес, елордада 207 жалпы білім беретін мектеп бар. 122-сі мемлекеттік, 78-і жекеменшік, ал жетеуі республикалық маңызы бар мектептер.

Таза қазақ тілінде оқытатын 35 мектеп жұмыс істейді. Орыс тілінде толық оқытатын бір мектеп бар. Қалған 85 мектеп аралас тілде білім береді.

Бұған дейін оқу-ағарту министрі Ғани Бейсембаев ата-аналардың қазақ тілінде оқытатын сыныптарға қызығушылығы артқанын, алайда орыс тіліндегі сыныптарды жабу көзделмейтінін мәлімдеген. Министрдің сөзінше, «қазақ тілінде оқытатын сыныптарға балаларын бергісі келетін ата-аналар саны жыл сайын артып келеді».

Сәуір айында президент Қасым-Жомарт Тоқаев та бұл тақырыпқа тоқталып, 80% мектеп бітіруші ұлттық тестілеуді қазақ тілінде тапсыратынын, ал биыл бірінші сыныпқа баратын оқушылардың 70%-дан астамы оқуын мемлекеттік тілде бастайтынын мәлімдеген. Мемлекет басшысы «ел азаматтарына қай тілде сөйлеуді ешкім мәжбүрлей алмайды, ал осы мәселе бойынша арандатуға жол берілмейді» деп ескерткен.